بنیامین ناتانیاھۆ، سەرۆکوەزیرێ ئیسرائیلێ د پەیامەکا ڤیدیۆیی دە پشتی ئێریشا ئاسمانی و بەژاھیێ یا بزاڤا حەماسێ ل سەر ئیسرائیلێ راگەھاند، “ئەم د شەری دە نە”.
ناتانیاھۆ د پەیامەکا ڤیدیۆیی دە کو ل سەر ھژمارا خوە یا فەرمی ل پلاتفۆرما “X”ێ پارڤە کریە دبێژە، “وەلاتیێن ئغسراعیلێ، ئەم د شەری دە نە و ئەم دێ ب سەر بکەڤن ژی”.
سەرۆکوەزیرێ ئیسرائیلێ د پەیاما خوەیا یەکێ دە پشتی ئێریشێن بالێ سەربازی یێن بزاڤا حەماسێ بۆ سەر ئیسرائیلێ گۆت: دژمن دێ ب رەنگەکی وەسا باجا کریارێن خوە بدە کو پێشتر نەدیتبە.
ل گۆری زانیاران، ژ بەر ئێریشێن ئیرۆ یێن ل سەر ئیسرائیلێ، نێزی 22 کەسان ھاتنە کوشتن و ب سەدان کەس ژی بریندار بوونە.
ئیرۆ دەمژمیر شەشێ سبەھێ کەتیبەیێن قەسام یێن بالێ سەربازی یێ بزاڤا حەماسێ ب ھەڤپاری لگەل سەرایا قودسێ ئۆپەراسیۆنا “تۆفانا ئەقسا”یێ بۆ سەر ئیسرائیلێ دەست پێ کر و د راگەھاندنەکێ دە پارڤە کریە کو زێدەتری پێنج ھەزار مۆشەکان ئاراستەیی ھەر یەک ژ باژارێن تەلەڤیڤێ و سیدۆرتێ و بیر سەبھێ ھاتنە کرن، د ئەنجامێ دە ژی زرارەکە زێدە گەھشتیە وان باژارێن باشوورێ ئیسرائیلێ.
کەتیبەیێن قەسامێ د راگەھاندنەکێ دە بەحسا وێ یەکێ ژی کر کو ئارمانج ژ ئۆپەراسیۆنا وان “بەرگریکرن ژ قودسێ ئازادکرنا ئاخا وانە و ھەتا رۆژا سەرکەفتنێ دێ بەردەوام بن”.
ل گۆری نووچەیەکا ئاژانسا رۆیتەرزێ، ژ بلی ئێریشا مۆشەکی بۆ سەر ئیسرائیلێ، ھژمارەکە چەکدارێن حەماسێ ژی چوونە ناڤ سنۆرێن ئیسرائیلێ و لگەل ھێزێن ئەولەھیێ یێن وی وەلاتی شەرێ کۆلان ب کۆلان دکن.
ئاماژە ب وێ یەکێ ژی ھات دان کو ب دەستپێکا ئێریشا مۆشەکی بۆ سەر ئیسرائیلێ ل باشوور و ناڤەراستێن وی وەلاتی زەنگا ھایدارکرنێ ھاتیە لێدان و سوپایێ ئیسرائیلێ رەوشا جەنگی راگەھاندیە و داخواز ژ یەکینەیێن سەربازی یێن زێدە کریە کو د ئامادەباشیێ دە بن، گەفا وێ یەکێ ژی کریە کو ئێدی دێ کۆمێن فلستینی ب جدی بکن ئارمانج.
