کۆچکا سپی راگەھاند، ب رەنگەکی راستەراست تەڤلی شەرێ حەماسێ و ئیسرائیلێ نابن.
بەردەڤکێ جڤاتا ئەولەھیێ یا کۆچکا سپی جۆن کێربی راگەھاند، وان چ پلانەک ژ بۆ تەڤلیبوونا شەرێ ناڤبەرا بزاڤا حەماسێ و سوپایێ ئیسرائیلێ ب رەنگەکی راستەراست نینە، لێ دێ ب ھەمی ئاوایان ل سەر هاریکاریکرنا ئیسرائیلێ بەردەوام بن.
جۆن کێربی د داخویانیەکە رۆژنامەڤانی دە بەحسا وێ یەکێ ژی کر کو ژ بەر ئالۆزی و ئێریشێن حەماسێ بۆ سەر ئیسرائیلێ نیگەرانن، دبە گەفا پاشەرۆژێ بۆ سەر ئیسرائیلێ ژ لبنانێ بە.
ل سەر شاندنا کەشتیا بالەفرھەلگر یا گەرالد فۆرد بۆ دەریایا ناڤەراست، بەردەڤکێ جڤاتا ئەولەھیێ یا کۆچکا سپی ئاماژە ب وێ یەکێ دا، ئارمانج ژ شاندنا وێ پاراستنا ئەولەھیا نەتەوەیی یا ئامەریکایێ یە.
سەرێ سبەھا رۆژا شەمبیێ، 7ێ جۆتمەھا 2023ێ، کەتیبەیێن قەسامێ یێن بالێ سەربازی یێ بزاڤا حەماسێ ب ھەڤپاری لگەل سەرایا قودسێ ئۆپەراسیۆنا “تۆفانا ئەقسا”یێ بۆ سەر ئیسرائیلێ دەست پێ کر. د راگەھاندنەکێ دە پارڤە کریە کو زێدەتری پێنج ھەزار مۆشەکان ئاراستەیی ھەر یەک ژ باژارێن تەلەڤیڤێ و سیدۆرتێ و بیر سەبھێ ھاتنە کرن. د ئەنجامێ دە ژی زرارەکە زێدە گەھشتیە وان باژارێن باشوورێ ئیسرائیلێ. پاشتر ئیسرائیلێ دەست ب ئێریشێن گران بۆ سەر کەرتێ غەززەیێ کر.
ل گۆر داوی ئامارێن وەزارەتا ساخلەمیێ یا فلستینێ، ژ بەر بۆردومانا ئیسرائیلێ بۆ سەر کەرتێ غەززەیێ، ھەتا نھا 687 کەس ھاتنە کوشتن، کو د ناڤ وان دە 140 زارۆک و 105 ژن ھەنە.
د ئەینی دەمێ دە ل دوو ئامارا نەتەوەیێن یەکگرتی، ژ بەر ئێریشێن ئیسرائیلێ، نێزی 123 ھەزار وەلاتیێن سڤیل ژ غەززەیێ ئاوارە بوونە.
