جیگرێ نوونەرا نەتەوەیێن یەکبوویی ل ئیراقێ کلۆدیۆ کۆردۆن، ھێزێن نەیاسایی یێن ل شنگالێ ب سەدەما جیبجینەکرنا رێکەفتنا شنگالێ تۆمەتبار دکە.
کلۆدیۆ کۆردۆن ل دیدارا میری 2023 ل ھەولێرێ راگھاند، دڤێت حەشدا شەعبی و ھێزێن پەکەکێ ژ شنگالێ دەرکەڤن. گۆت ژی: “جیبجینەکرنا ڤێ رێکەفتنێ، باندۆرێ ل خەلکێ شنگالێ دکە و رێ ل بەر ئاڤەدانکرنا ناڤچەیێ دگرە.
جیگرێ نوونەرا نەتەوەیێن یەکبوویی ل ئیراقێ دەستنیشان کر، ڤەکشینا حەشدا شەعبی و ھێزێن پەکەکێ بەشەک ژ رێکەفتنا شنگالێ یە، لێ ھەتا نھا چ ھێزەک ژ وان ژ ھەرێمێ ڤەنەکشیە.
ھەروھا گۆت: “جڤاکا ناڤدەولەتی گرنگیەک مەزن ددە جیبجیکرنا رێکەفتنا شنگالێ، ژ بۆ دوبارە ئاڤەدانکرنا ژێرخانا باژێر ژی، چەند پرۆژە ھەنە کو بێی ھەبوونا رێڤەبەریەکا پێباوەر، ناڤچە نایێ ئاڤەدانکرن.
کلۆدیۆ کۆردۆن ھەروھا گۆت: “وەک میناک ئەگەر بالیۆزێ ژاپۆنێ بخوازە دبستانەکێ ل شنگالێ ئاڤا بکە، چ گارانتی نینە کو پشترە ئەو دبستان بهێت ئاڤاکرن.
دا زانین ژی، ئەو لگەل حکوومەتا ھەرێما کوردستانێ و حکوومەتا فەدەرال خەباتێن خوە ددۆمینن و گۆت: “ئەم دلخوەشن کو لگەل جڤاکا شنگالێ ھەڤدیتنێ دکن، دا کو بزانن کا چ دخوازن.”
وەکی جیگرێ نوونەرا تایبەتا نەتەوەیێن یەکگرتی ئاماژە ب وێ یەکێ ژی کر، خزم و قوربانیێن داعشێ ل شنگالێ، بەردێلا جیبجینەکرنا رێکەفتنێ ددن.
کلۆدیۆ کۆردۆن د وێ باوەریێ دەیە کو جیبجینەکرنا رێکەفتنا شنگالێ، ئاماژەکە نە باشە و نیشانا وێ یەکێ یە کو شیانا ئیراقێ یا پابەندبوونا ب رێکەفتنان نینە.
رۆژا 9 جۆتمەھا 2020 حکوومەتا ئیراقێ و حکوومەتا ھەرێما کوردستانێ ل بەغدایێ ب چاڤدێریا سەرۆکوەزیرێ بەرێ یێ ئیراقێ مستەفا کازمی رێکەفتنا شنگالێ ئیمزە کربوون کو ژ 6 خالان پێک تێ.
وەزیرێ ناڤخوەیێ ھەرێما کوردستانێ رێبەر ئەحمەد ژی دوھی د دیدارا میری دە راگھاند، رێکەفتنا شنگالێ یەک ژ دەستکەفتێن دانوستاندنێن دەمدرێژێن بەغدا و ھەولێرێ یە، لێ چ ئیرادەیەکا سیاسی یا بھێز ژ بۆ جیبجیکرنا ڤێ رێکەفتنێ ل بەغدایێ نینە.
