ل گۆری راپۆرا پێگەها «ئیراق ئۆیل ریپۆرت»، ترکیێ ژ دەستپێکا مەها جۆتمەهێ ڤە ب فەرمی ژ رایەدارێن ئیراقێ رە راگهاندیە، کو بۆریا پەترۆلێ ژ بۆ دوبارە هناردەکرنا پەترۆلا هەرێما کوردستانێ ئامادەیە.
راپۆر خوە دسپێرە نامەیەکە فەرمی یا کۆمپانیایا بازرگانیا پەترۆلێ یا ترکیێ «بۆتاس» کو 2ێ جۆتمەهێ ژ هەڤتایا خوە یا ئیراقی رە شاندیە و ب فەرمی رایەدارێن حکوومەتا ئیراقێ ئاگاهدار کرنە کو بۆریا پەترۆلێ یا ئیراق-ترکیە ژ بۆ ڤەگوهەستن، بارکرن و ئەمبارکرنا پەترۆلێ د ناڤ ئاخا ترکیێ دە ئامادەیە.
د بەشەکە دن یا نامەیێ دە هاتیە گۆتن، «هناردەکرنا پەترۆلێ ژ هەرێما کوردستانێ ڤە دکارە ژ رۆژا چارشەمێ 4ێ جۆتمەها 2023ان ڤە دوبارە دەست پێ بکە».
ئەڤ یەک د دەمەکێ دە یە، سەرۆکوەزیرێ ئیراقێ محەمەد شه‌یاع سوودانی رۆژا 11ێ جۆتمەهێ ل هەفتەیا ئەنەرژیێ یا رووسیایێ (REW) ل مۆسکۆیێ دە گۆت: «ئیراق ئامادەیە کو هناردەکرنا پەترۆلێ ب رێیا بەندەرا جەیهانێ رە ژ نوو ڤە دەست پێ بکە».
خەتا بۆریا د ناڤبەرا ئیراق و ترکیەیێ دە کو پەترۆلا کوردستانێ ب رێیا وێ بۆ بەندەرا جەیهانا ترکیەیێ تێ هناردەکرن، ژ 25ێ ئادارێ ڤە ل سەر داخوازا حکوومەتا ئیراقێ هاتیە راوەستاندن.
هەر چەندە گەلەک جاران بەرپرسێن هەر دو حکوومەتێن ئیراق و ترکیەیێ ئامادەهیا خوە ژ بۆ دەستپێکرنا هناردەکرنا پەترۆلێ ژ هەرێما کوردستانێ راگهاندنە، لێ هەتا نها پەترۆلا هەرێما کوردستانێ نەهاتیە هەناردەکرن.
