چاپەمەنیا ئیراقی راگھاند کو ھێزێن حەشدا شەحبی یێن ئیراقی د ئێریشێن ل سەر سینۆرێ لوبنان-ئیسرایل ل غەززەیێ دە ھاتنە کوشتن.
رایەدارەکی عەرەب یێ شیعە ژ بۆ ئەل-مادا پرێس پشتراست کر کو ھێزەکا چەکدارێن نوجەبا یێن ئیراقی گھیشتنە سینۆرێ لوبنان-ئیسرائیل و د ئێریشا ئیسرائیلێ یا ل سەر سینۆر دە، ھێزێن چەکدارێن نوجەبا یێن حەشدا شەعبی زیان دیتنە.
وی بەرپرسێ کو نەخوەست ناڤێ خوە ئەشکەرە بکە گۆت، ئەگەر تەل ئەڤیڤ ئێرشەکا بەژایی ل دژی غەززەیێ بکە، دێ بەشداربوونا گرووپێن چەکدار یێن ئیراقێ زێدەتر ببە، لێ ھەتا نھا حەشدا شەعبی ب فەرمی بەشداری شەرێ د ناڤبەرا حەماس و ئیسرائیلێ دە نەبوویە. تەڤی راگھاندنا واشینگتۆنێ یا شاندنا کەشتیێن بالەفران بۆ دەریایا سپی.
ژ ئالیێ خوە ڤە، بەردەڤکێ لیوایێن سەیید شوھەدا یێن حەشدا شەعبی کازم فەرتووسی گۆت، ھێزێن ئیراقی ئامادە نە کو ل سەر ئەردێ و د راستیێ دە، نە ب رێیا مەدیایێ، دەستێوەردانێ ل غەززەیێ بکن.
ل گۆری ئەل-فەرتووسی کو ژ بۆ مەدیایا ھەرێمی یا ئیراقێ ئاخڤی، دەستوەردانا وان ب گرانی ب “تەڤلیبوونا راستەراست یا ئامەریکایێ د شەر دە یە.”
پێشتر رێبەرێ بەدر ھادی عامری و رێبەرێ تەڤگەرا سەدر موقتەدا سەدر ھشیاری دابوون ئامەریکا کو ئەگەر دەستێوەردانێ بکە ھێزێن حەشدا شەعبی ل ئیراقێ دێ بنگەھ و بارەگەھێن ئامەریکا بکن ئارمانج.
د ڤێ ناڤبەرێ دە سەرۆکێ کۆما ئەھلی حەق قەیس ئەل-خەزعەلی گۆت کو ئەو بوویەران ژ نێزیک ڤە دشۆپینن، نە وەک تەماشەڤان.
لێ چاڤکانیێن نووچەیان بەلاڤ کرن کو تەڤگەرا نوجەبا یا ب پێشەنگیا ئەکرەم ئەل-کعبی گھشتیە سینۆرێ ئیسرائیلێ و بەشداری شەرێ ژ بۆ ھێزێن حەماسێ بوویە و بوویە سەدەما زیانێن جانی.
تەڤگەرێ د ڤیدیۆیەکێ دە راگھاند کو نووجەبا ب لەز دمەشە ژ بەر کو چ پێوەندیا وێ ب حکوومەتا ئیراقێ ڤە نینە و خوەدی بریارێن سەربخوە یە.
