وەزیرێ دەرڤە یێ ئیرانێ، حوسێن ئەمیر عەبدوللاھیان، ئاماژە دا وێ یەکێ کو مومکنە د چەند دەمژمێرێن بێ دە حزبوللاھا لبنانێ ئێریشا بەرگریێ ل دژی ئیسرائیلێ بکە.
عەبدوللاھیان د ھەڤدیتنەکە تلەڤزیۆنی یا گرێدایی ھەلسەنگاندنا شەرێ ناڤبەرا ئیسرائیل و حەماسێ دە راگەھاند، “مومکنە د چەند دەمژمێرێن بێ دە حزبوللاھا لبنانێ ئێریشا بەرگریێ ل دژی ئیسرائیلێ بکە. ھەروەسا وی گۆت: سەرکردەیێن بەرگریێ رێیێ نادن کو رژێما ئیسرائیلێ ھەر کریارەکێ (ئێریشا بەژاھیێ) ل غەززەیێ بکە و پاشی ئێریشێ بکە سەر ھێزێن دن یێن بەرگریێ. ھەمی ھەلبژارتن ل بەر سنگێ حزبوللاھێ نە”.
وەزیرێ دەرڤە یێ ئیرانێ تەکەز کر: “تێ چاڤەرێکرن کو د چەند دەمژمێرێن بێ دە ئێریشا بەرگریێ یا بەرەیێ بەرگریێ ل دژی ئیسرائیلێ بێ کرن”.
پشتی دەستپێکرنا شەرێ ناڤبەرا ئیسرائیلێ و بزاڤا حەماسێ، حزبوللاھا لبنانی گەفان دکە کو ئێریشێ بکە سەر ئیسرائیلێ. پێشتر جیگرێ ئەمیندار گشتی یێ حزبوللاھا لبنانی، نەعیم قاسم، راگەھاندیە: ئەم ئامادەنە کو پەیوەندیێ ب برایێن خوە یێن حەماسێ و کۆمێن بەرگریێ یێن فلستینێ بکن ژ بۆ ئێریشکرنا ل سەر ئیسرائیلێ لێ ئەم ل بەندا دەما گونجایی نە”.
ئەڤە د دەمەکێ دە یە کو د چەند ھەفتیەکێن بۆری دە سوپایێ ئیسرائیلێ زێدەتری جارەکێ بارەگایێن حزبوللاھا لبنانی ل باشوورێ لبنانێ بۆمبەباران کرنە. ل بەرانبەری وێ یەکێ ژی، حزبوللاھێ ب رێیا دەربازکرنا چەکدارێن خوە ژ بۆ ناڤ ئاخا ئیسرائیلێ فەرماندەیەکی بلندێ سوپایێ ئیسرائیلێ کوشت.
