ئۆتۆمۆبیلەک ل ناڤا باژارێ قامشلۆ ھات تەقاندن: کوشتی ھەنە

ل باژارێ قامشلۆ ل نێزی دۆرھێلا ئەل-قووەتلی ئۆتۆمۆبیلەک ھات ئارمانجکرن، د ئەنجامێ دە 2 کەس ھاتن کوشتن.

ل گۆر ئاگاهیان، درۆنەکە ترکیەیێ ئۆتۆمۆبیلەک ل ناڤا باژارێ قامشلۆ ل سەر رێیا کۆرنیش ل نێزی دۆرھێلا ئەل-قووەتلی بۆمبەباران کر.

ئاگاهی ددن خویاکرن، ئۆتۆمۆبیلا ھاتیە ئارمانجکرن سەربازییە و د ئەنجامێ دە 2 کەسێن د ناڤا وێ دە بوون، جانێ خوە ژدەست دانە.

ھەتا نھا چ داخویانیەکە فەرمی ژ ئالیێ رێڤەبەریا خوەسەر و ئاسایشێ د دەربارێ ڤێ ئێریشێ دە نەھاتیە دایین.

ئەڤ ئێریش د دەمەکێ دەیە، ئارتێشا ترکیەیێ ژ رۆژا 5 جۆتمەھێ ڤە ناڤچەیێن جودایێن رۆژئاڤایێ کوردستانێ، سازیێن خزمەتکاریێ، وێستگەھێن ئەلەکتریک و ئەنەرژیێ، ناڤەندێن ھەسەدێ و ئاسایشێ بۆمبەباران کرن.

ل گۆری ئامارێن رێڤەبەریا خوەسەر ژی، د ئەنجاما ئێریشێ د ناڤبەرا 5 -9 جۆتمەھێ دە، 44 کەس ھاتنە کوشتن و 55 کەس ژی بریندار بوونە، د ناڤا وان دە، زارۆک، ئەندامێن ئاسایشێ و شەرڤانێن ھەسەدێ ژی ھەبوون.