شەڤا 26ێ ئیلۆنا 2023 ل ناڤچەیا حەمدانیێ یا سەر ب پارێزگەها نەینەوایێ ڤە د هۆلەکا شەهیانان دە شەوات دەرکەت، ئەڤ شەواتە بوو سەدەم پێتری 113 کەسان جانێ خوە ژ دەست بدن و پێتر ژ 200 کەسان ژی بریندار ببن.
ژ بەر کارڤەدانێن توند یێن پشتی ڤێ بوویەرێ حکوومەتا ئیراقێ نەچار ما ئالیێن پێوەندیدار راسپێرە ژ بووی وەرگرتنا رێکارێن هەری توند ل همبەر هۆلێن شاهیان و یانەیێن شەڤانە یێن دکەڤن سینۆرێ دەشتا نەینەوایێ و پرانیا وان داخستن و بریار دا نەیێن ڤەکرن هەیا کو شەرت و مەرجێن سەلامەتیێ جیبجی بکن. لێ بەلێ یانەیا شەڤانە یا ب ناڤێ رەستۆرانت و گازینۆیا “لباشا” نەهات داخستن، تەڤی کو ت شەرت و مەرجێن سەلامەتیێ تێ دە نەبوون.
چاڤکانیێن پێگەها دارکا مازی ئەشکەرە کرن، ناڤێ خوەدیێ رەستۆرانت و گازینۆیا “لباشا” دیار شیما یە، ئەو زاڤەیێ رەیان و ئۆسامە کلدانی یە، تەڤی کو ئەڤ یانەیا شەڤانە وەکە هۆلا هەیسەم یا شەوتی هاتیە دروستکرن ژی، لێ بەلێ ژ بەر کو زاڤەیێ رەیان کلدانی خوەدیێ ڤێ گازینۆیێ یە ئالیێن پێوەندیدار نەکارین ت رێکارەکی ل همبەر وان وەرگرن.
چاڤکانیێن دارکا مازی هەر وەها ئەشکەرە کرن، برایێ سەمیر سەلمان نەبوو خوەدیێ هۆلا “هەیسەم” یێ ب ناڤێ عەقید عامر سلێمان نەبوو د سالا 2017 دە فەرماندارێ یەکینەیەکا رێخستنا بابلیۆن بوو ل حەمدانیێ، عامر هەڤبەشێ ئۆسامە کلدانی فەرماندارێ لیوایا 50 یا بابلیۆنە و دەست د دروستکرنا هۆلا هەیسەم دە هەبوویە.
هەر وەها د چارچووڤەیا پرۆپاگاندایێن بزاڤا بابلیۆن دە ژ بۆی هلبژارتنێن داهاتی یێن ئەنجوومەنێن پارێزگەهێن ئیراقێ، ئۆسامە کلدانی 6 ئۆتۆمۆبیلێن حکوومی یێن وەزیرا کۆچ و کۆچبەرێن ئیراقێ ژ بۆی پرۆپاگاندایێن خوە د دەما سەرەدانیکرنا بەرپرس و کەساتی و شێخێن ل سینۆرێ نەینەوایێ بکار ئانینە هەیا کو هەژمارا ئۆتۆمۆبیل و کەسێن لگەل وی دە زێدەتر خوەیا بکن، د نها دە کاروانێ ئۆتۆمۆبیلێن ئیڤان فایەق وەزیرا کۆچ و کۆچبەرێن ئیراقێ ب تەنێ ژ 2-3 ئۆتۆمۆبیلان پێک تێ.
