هەژمارەک هەری زێدە یا کادرۆیێن پەکەکێ و فەرماندارێن هەسەدێ ل رۆژئاڤا کوردستانێ هاتنە کوشتن، هەما بێژە رۆژ ناچە فەرماندار یان کادرۆیەکی پەکەکێ ل رۆژئاڤا ژ ئالیێ بالەفرێن بێ مرۆڤ یێن ئارتێشا ترکیێ ڤە نەیێ ئارمانجکرن، لێ ژ بەر کو رۆژئاڤا د بن دەستهلاتا پەکەکێ و رێخستنێن سەر ب وێ ڤە یە نکارە ت کەسی ب ڤێ یەکێ کو ئاگاهیان ددە ترکیێ سووچبار بکە.
هەری داوی، ناڤەندا راگھاندن و چاپەمەنیێ یا هەسەدێ راگھاند کو فەرماندارێ وان یێ ب ناڤێ فەرھاد دێرک (شبلی شبلی) د ئێریشا ھەوایی یا دەولەتا ترک دە هاتیە کوشتن.
ل گۆر داخویانیا ناڤەندا راگهاندن و چاپەمەنیێ یا هەسەدێ، سبەها رۆژا ئینی 27/10/2023ان فەرماندارێ وان فەرهاد دێرکی دەما دخوەست ڤەگەرە مالا خوە د ئێریشەکا بالەفرێن بێ مرۆڤ دە ل ناڤەندا باژارێ دێرکێ یێ باکورێ رۆژهلاتێ باژارێ قامشلۆ هاتیە ئارمانجکرن و د ئەنجامێ دە جانێ خوە ژ دەست دایە.
ئارمانجکرنا فەرماندارێن هەسەدێ-پەکەکێ ل رۆژئاڤا کوردستانێ ب ئاوایەکی زێدە بوویە کو گەلێ رۆژئاڤا راستەراست پەکەکێ ب پێدانا ئاگاهیان ب دەولەتا ترک سووچبار دکە و دبێژە، ” د ناڤا پەکەکێ ب خوە دە ئاگاهی ژ دەولەتا ترک رە تێن شاندن، پەکەکە بوویە رێ نێشاندەرا دەولەتا ترکیێ ژ بۆی ئارمانجکرنا فەرماندارێن هەسەدێ و داگیرکرنا رۆژئاڤا، ژ بەر کو رۆژئاڤا د بن دەستهلاتداریا پەکەکێ ب خوە دەیە و هەر تشت ل رۆژئاڤا بقەومە پەکەکە ژێ بەرپرسیارە”.
