ھێزێن ئاسمانی یێن ئیسرائیلێ راگھاند، فرۆکەیێن ئیسرائیلێ شەڤا بۆری 150 ئارمانج ل باکورێ کەرتا غەززەیێ بۆمبەباران کرن.
ھێزێن ئاسمانی یێن ئیسرائیلێ ل سەر پلاتفۆرما “X” راگھاند: “د ئەنجاما بۆمبەبارانکرن و ژناڤبرنا بارەگەھێن حەماسێ و ژێرخانەیا وێ دە، ھەژمارەک چەکدارێن حەماسێ ھاتن کوشتن.”
بەردەڤکێ ئارتێشا ئیسرائیلێ ئافیخای ئادرای د پلاتفۆرما “X” دە ئاشکەرە کر، نێزیکی 100 فرۆکەیێن شەری ب سەدان مووشەک ل 150 ئارمانجێن حەماسێ دان.
ژ دەستپێکا شەر و پەڤچوونێن د ناڤبەرا حەماس و ئیسرائیلێ دە، شەڤا بۆری یا ھەری گران یا ئێریشێن ئاسمانی یێن ئیسرایلێ ل سەر کەرتا غەززیێ بوو. ھەروھا ئیسرائیلێ ژی دەست ب ئۆپەراسیۆنەکا بەرفرەھ ل سەرانسەرێ غەززەیێ کریە.
ھەروھا ئارتێشا ئیسرائیلێ کوشتنا سەرۆکێ سیستەما ئاسمانی یا تەڤگەرا حەماسێ عیسام عەبوو روکبا راگھاند.
رۆژا 7 جۆتمەھێ، چەکدارێن حەماسێ زێدەتری پێنج ھەزار مووشەک ئاڤێتن ئیسرائیلێ و تێلا سنۆری یا د ناڤبەرا کەرتێ غەززەیێ و کۆمەلگەھا جھوویان دە برین، ھەژمارەک ژ ئیسرائیلی کوشتن و ھەژمارەک ژی وەک دیل رەڤاندن.
ل گۆری ئامارێن ھەری داوی یێن تەندورستیێ یێن غەززەیێ، ھەتا نھا 7326 فلستینی هاتنە کوشتن و نێزیکی 18 ھەزار و 500 کەس ژی بریندار بوونە. ھەروھا 1400 ئیسرائیلی ھاتنە کوشتن.
بەردەڤکێ فەرمی یێ ئارتێشا ئیسرائیلێ دانیێل ھاگاری راگھاند، ھەژمارا دیلێن کو ژ ئالیێ عەماسێ ڤە ل کەرتا غەززەیێ ھاتنە گرتن، 229 کەسن.
