HEDEP ب ھەلکەفتا سەدسالیا کۆمارا ترکیەیێ داخویانیەک پارڤە کر و راگەھاند کو ئەو دخوازن کۆمارا ترکیەیێ د سەدسالا وێ یا دویێ دە بکن کۆمارەکا دەمۆکراتیک.
ھەڤسەرۆکێن پارتیا وەکھەڤی و دەمۆکراسیا گەلان HEDEP ب ھەلکەفتا سەدسالیا کۆمارا ترکیەیێ داخویانیەک پارڤە کر. ئەو دخوازن، د سەدسالا دویەمیا کۆمارا ترکیەیێ دە، کۆمارەک دەمۆکراتیک ئاڤا بکن، ژ بۆ کو ھەم پرسا کوردان بهێت چارەسەرکرن، ھەم ژی رۆژھلاتا ناڤین د ناڤ ئارامی و ئاشتیێ دە بژی.
تولای ھاتمۆگولار و تونجەر باکرھان د وێ داخویانیێ دە راگەھاند، کۆمارا ترکیەیێ د سەدسالا خوە یا بۆری دە ژ بنگەهـ و پیڤانێن دەمۆکراتیک دوور بوو. ژ بەر وێ ژی، ئەوقاس زولم و زۆرداری ل گەلان، ب تایبەت ل گەلێ کورد، ھاتیە کرن.
ھەروەسا ئەو داخواز ژی دکن، ژ بۆ کو بوویەرێن بۆری دوبارە نەبن و پرسا کوردان ژی ب یەکجاری بێ چارەسەرکرن، دڤێت کۆمار ببە کۆمارەکا دەمۆکراتیک و ب ڤێ یەکێ، رۆژھلاتا ناڤین ژی د ناڤ ئارامی و ئاشتیێ دە بژی.
پێشتر ژی ھەڤسەرۆکێ نوویێ HEDEP تونجەر باکرھان راگەھاندبوو کو ئەو ئامادە نە ژ بۆ چارەسەرکرنا پرسگرێکان لگەل ھەر ئالیەکی دانووستاندنان بکن، ب وی شەرتی کو ناڤەرۆکا دانووستاندنان ژ بۆ رایا گشتی بێ ئەشکەرەکرن.
ھەروەسا وی گۆتبوو: پرسا کوردان ب رێ و رێبزێن نەھێنی چارەسەر نابە. پێڤاژۆیا چارەسەریێ پێڤاژۆیەک راست بوو.
پارتیا چەپا کەسک د کۆنگرەیا خوە دە، کو بەری دو ھەفتەیان ل ئەنقەرەیێ ھاتبوو لدارخستن، ناڤێ پارتیا خوە گوھەرت و کر پارتیا وەکھەڤیا گەلان و دەمۆکراسیێ (HEDEP). تونجەر باکرھان و تولای ھاتمۆگولار ژی بوون ھەڤسەرۆکێن وێ.
