کۆچا وەلاتیێن ترکیێ بۆ ئەورۆپایێ ب تایبەت ئالمانیایێ ھەر زێدە دبە و ڤێ جارێ ھەژمارا وەلاتیێن ترک یێن داخوازا پەنابەریێ ژ ئالمانیایێ دکن، ژ ھەژمارا ئەفغان و سووریان زێدەتر بوویە.
ل گۆر زانیاریان، تەنێ د مەھا بۆری دە نەھ ھەزار وەلاتیێن ترکیێ ب رێیێن قاچاخ کەتنە ناڤ سینۆرێن ئالمانیایێ و داخوازا پەنابەریێ ژ وی وەلاتی کرنە.
ب ڤێ یەکێ، ھەژمارا وەلاتیێن ترک یێن داخوازا پەنابەریێ ژ ئالمانیایێ کرنە، ژ ھەژمارا ئەفغان و سووریان کو ژ شەر رەڤیانە دەرباس کر و ھەری زێدە، وەلاتیێن ترکیێ داخوازا پەنابەریێ ژ ئالمانیایێ دکن.
رۆژنامەیا ئالمانی “Die Welt” ژی ددە زانین، سالا بۆری 40 ھەزار وەلاتیێن ترکیێ پەنابەری ئالمانیایێ بوونە و ئەگەر ھەیە ئەڤ ھەژمارە ئیسال بگھژە 100 ھەزار کەسان.
ئەڤ رۆژنامەیا ئالمانی ژی، کۆچا وەلاتیێن ترکیەیێ بۆ ئالمانیایێ ب دو سەدەمێن بنگەھین، ھلبژارتن و ھەلاوسانێ ڤە گرێ ددە.
ژ ئالیەکی دن ڤە، بریارەکا حکوومەتا ئالمانیایێ ژی دکارە کۆچا وەلاتیێن ترکیێ، زێدەتر بکە، کو ئەنجوومەنا وەزیران یا ئالمانیایێ پرۆژەیاسایا کو بەلگەنامەیا کارکرنێ ددە پەنابەران، قەبوول کر.
ل گۆری ئامارێن ئۆفیسا فەدەرال یا کۆچبەری و پەنابەران یا ئالمانیایێ، د سالا 2016 دە، ترکیا ل پشتی سووریا، ئیراق و نیجیریایێ د رێزا چارەمین یا داخوازا پەنابەریێ دە بوو.
