کەمال کلچدارۆگلو د کۆنگرەیا جه‌هه‌پێ دە شکەست و ئۆزگور ئۆزەل بوو سەرۆکێ نوو یێ پارتیا گەل یا کۆمارێ (جه‌هه‌پێ).
کۆنگرەیا 38مین یا ئاسایی یا جه‌هه‌پێ ل ئەنقەرەیێ لدار دکەڤە و د رۆژا یەکەمین یا کۆنگرەیێ دە 1367 ئەندامێن کۆنگرەیێ سەرۆکێ نوو یێ جه‌هه‌پێ، رێڤەبەریا نوو یا پارتیێ هلبژارتن.
د گەرا دویەم یا دەنگدانێ دە، ئۆزگور ئۆزەل 812 دەنگ ژ کۆما 1366 وەرگرتن و بوو سەرۆکێ نوو یێ جه‌هه‌پێ. سەرۆکێ بەرێ کەمال كلچدارئۆگلو ژی، 536 دەنگ بدەست خستن.
کلچدارئۆگلو 13 سالن سەرۆکاتیا جه‌هه‌پێ دکر. د هلبژارتنا بۆری دە نامزەدێ سەرۆکۆماریا ترکیەیێ بوو، لێ سەرنەکەتبوو. وێ ئەنجامێ نەرازیبوونێن توند ل دژی وی د ناڤا جه‌هه‌پێ دە زێدەتر کربوو.
ئۆزگور ئۆزەل پشتی کو بسەر کەت ئاخافتنا سپاسیێ کر و گۆت، ئەوێ خەم و دلگرانیێن د سەدسالا یەکەمین یا ترکیەیێ دە پەیدا بووبوون، دێ د سەدسالا دویەمین دە قەرەبوو بکن.
ئۆزەل (49 سالی) فاکۆلتەیا دەرمانسازیێ یا زانینگەها ئەگەیێ خوەندیە، پارلامەنتەرێ مانیسایێ و جیگرێ سەرۆکێ کۆما جه‌هه‌پێ ل پارلامەنتۆیێ بوو و ژ سالا 2011ان و ڤر ڤە ژی پارلەمەنتەرە.
جه‌هه‌په پارتیا هەری کەڤنارا ترکیەیێ یە و د دیرۆکا خوە یا 100 سالان دە هەتا نها 7 کەسان سەرۆکاتیا جه‌هه‌پێ کرنە. کەمال کلچدارئۆگلو ژ سالا 2010ان ڤە سەرۆکێ گشتییێ وێ پارتیێ بوو.
