حزبولاھا لبنانی ژ 7ێ جۆتمەھێ ڤە، 1500 چەکدارێن خوە ژ سووریێ ڤەکشاندنە و ل سەر سینۆرێ ئیسرائیلێ بجھ کرنە.
ل گۆری مەدیایا لبنانی، حزبولاھا لبنانی ژ دەستپێکێ شەرێ حەماس و ئیسرائیلێ، زێدەتر ژ 1500 چەکدارێن خوە ژ سووریێ ڤەکشاندنە و شاندنە نێزیکی سینۆرێ ئیسرائیلێ.
مەدیایا لبنانی ئاماژە ب وێ کرن، چەکدارێن حزبولاھێ یێن کو ژ سووریێ ڤەکشیانە، لگەل ئارتێشا سووریێ ل پارێزگەھێن ئدلب، حومس و حەلەبێ شەر کرنە.
ئەڤ بریارا حزبولاھێ، پشتی پەڤچوونێن د ناڤبەرا ئەندامێن وێ و ئارتێشا ئیسرائیلێ ل سەر سینۆرێ باشوورێ لبنانێ ژ 8ێ جۆتمەھا بۆری ڤە ھات.
ل گۆری مەدیایا لبنانێ، کۆمێن ئالیگرێن ئیرانێ یێن وەکە لیوایێن فاتمیوون و باقر یێن ئەفغانی، دێ ل سووریێ شوونا چەکدارێن حزبولاھێ بگرن.
ئیسرائیل حزبولاھا لبنانی وەک ھەڤالبەندێ حەماسێ دزانە، سەرۆکوەزیرێ ئیسرائیلێ بەنیامین نەتانیاھو ژی ھشیاری دابوو حزبولاھێ کو شەرێ ئیسرائیلێ نەکە، ژ بەر کو دێ “ب ڤی ئاوایی شاشتیا خوە یا ھەری مەزن بکە.”
رۆژا 7ێ جۆتمەھێ تەڤگەرا حەماسێ ئێریشی سەر ئیسرائیلێ کر، ھەژمارەک ژ ئیسرائیلیان کوشتن و ھەژمارەک ژی وەک دیل رەڤاندن، پشترە ژی ئیسرائیلێ دەست ب ئێریشەکا دژوار ل سەر غەززەیێ کر.
ھەتا نھا ھەژمارا کوشتیێن غەززەیێ 10 ھەزار دەرباس کریە، 1400 ئیسرائیلی ھاتنە کوشتن و ب دەهان هەزار ژی ژ ھەردو ئالیان بریندار و وندا بوونە.
