ل باژارێ منبجێ یێ د بن کۆنترۆلا ھێزێن سووریا دەمۆکراتیک “هەسەدێ” دە کریزا سۆتەمەنیێ بەردەوامە و وەلاتی گازندان دکن.
ل گۆری وێنەیێن کو ئیرۆ ل سەر مالپەرێن تۆرا جڤاکی ھاتنە بەلاڤکرن، ب دەھان ئۆتۆمبێل د سرایا ل وێستگەھا “ئۆم ئەلقورا” ل منبجێ راوەستیانە بۆ وەرگرتنا پارا سۆتەمەنیێ.
د ڤێ دەربارێ دە، ژێدەرەکێ خوەجھی ژ باژارێ منبجێ راگھاند، کریزا سۆتەمەنیێ ل باژارێ منبجێ ب تایبەت یا بەنزینێ بەردەوامە، وەلاتی ب دەمژمێرێن درێژ د سرایا سۆتەمەنیێ دە رادوەستن بۆ بدەستخستنا سۆتەمەنیێ، ئەڤ چەندە ژی ب نەرێنی باندۆرێ ل سەر تەڤگەرا پیشەسازی و بازرگانیێ ل باژێری دکە.
تەکەز کر، چاندنی ژێدەرا ئابۆری یا سەرەکی یا خەلکێ منبجێ یە، سەرباری بازرگانی و پیشەسازیێ، لۆما خەلک نەچار دبە کو سۆتەمەنیێ ژ بازارێ رەش ب نرخەکی گرانتر دەردۆرا 5 ھەزار لێیرەیێن سووری بکرە، ئەڤ چەندە ژی زیانێ دگهینە وان.
رۆژا 17 ئێلوونا 2023 رڤەبەریا پەیەدێ نرخێ بەنزینێ کو ژ ئالیێ وێ ڤە تێ دابەشکرن ژ 525 لیرەیێن سووری بۆ 2100ی، یا ل بازارێ تێ فرۆتن ژ 1700 لیرەیان بۆ 4100 لیرەیان بلند کر.
ھەڤدەمێ بەردەوامیا کریزا سۆتەمەنیێ ل باژارێن رۆژئاڤایێ کوردستانێ و دەڤەرێن د بن کۆنترۆلا هەسەدێ دە، رەوانگەھا سووری یا مافێن مرۆڤان، 6 مژدارێ د راپۆرتەکا خوە دە تەکەز کر، کو رێڤەبەریا پەیەدێ پەترۆلێ ژ دەڤەرێن د بن کۆنترۆلا خوە دە دەرباسی دەڤەرێن رێژیما سووری و گرووپێن چەکدار دکە.
