ھەڤدەمێ بەردەوامیا کریزا سۆتەمەنیێ ل باژار و باژارۆکێن رۆژئاڤایێ کوردستانێ و دەڤەرێن د بن کۆنترۆلا هەسەدێ دە، بلندبوونا نرخێ ڤەگوھەستنا گشتی ئێش و ئازارێن خەلکێ زێدەتر دکە.
ژێدەرەکێ خوەجھی ژ باژارێ رەقایێ ئیرۆ 12 مژدارا 2023 راگھاند، رێڤەبەریا پەیەدێ کریا ڤەگوھەستنا ھوندرین ل رەقایێ ژ 500 لێرەیێن سووری بۆ 1000 لیرەیان بلند کر.
ژێدەرێ تەکەز کر، ژ بەر نەبوونا ھەڤسەنگیێ د ناڤبەرا داھاتا رۆژنە و نرخێن کرێیا گشتی، وەلاتی گازندان دکن و نەرازیبوون ل ھەمبەر کریارێن پەیەدێ زێدە بوونە.
د ئێلوونا بۆری دە، رێڤەبەریا پەیەدێ، نرخێ لیترا بانزین ڤەگوھاستن و پیشەسازیێ کرە 2050 لیرە، یا کو ب شێوەیەکی ئازاد ل بازارێ تێ فرۆتن بۆ 4100 لیرەیان بلند کر و ل بازارا رەش ژی لترا بانزینێ ب نێزیکی 5 ھەزار لیرەیان تێ فرۆتن.
ھەڤدەمێ کو ناڤچەیێن رۆژئاڤایێ کوردستانێ ژ بەر نەبوونا سۆتەمەنیێ دنالن، هەسەدە د شاندنا داھاتێن پەترۆلێ دە بۆ رێژیما سووری و چەکدارێن “ئارتێشا نشتیمانێ” بەردەوامە.
د ڤێ دەربارێ دە، رەوانگەھا سووری یا مافێن مرۆڤان د راپۆرتەکێ دە رۆژا 5 مژدارێ تەکەز کربوو: “کاروانەکێ مەزن کو ب سەدان تانکەرێن پەترۆلێ ل خوە دگرتن، ژ ناڤچەیێن د بن کۆنترۆلا هەسەدێ دە ل بیابانا سووری دەرکەتن، بەشەک بەر ب ناڤچەیێن چەکدارێن ئارتێشا نشتیمانێ ڤە چوو ویا دن بەر ب ناڤچەیێن رێژیمێ ڤە.”
بەریا نھا ژی چەندین جار دیدەڤان، چالاکڤان و راگھاندکاران دایە زانین کو رێڤەبەریا پەیەدێ، سۆتەمەنیێ دشینە ناڤچەیێن ئۆپۆزسیۆن و رێژیما سووری.
