چەکدارێن ئۆپۆزسیۆنا سووریەیێ یێن لگەل ئارتێشا ترکیەیێ ھەرێما عەفرینێ داگیر کرنە، دەست دانین سەر 3870 دارێن زەیتوونان و ب بھانەیا پشتەڤانیا غەززەیێ، باجێ ل سەر جۆتکاتان فەرز دکن.
رەوانگەھا سووری یا مافێن مرۆڤان (SOHR) راگھاند، چەکدارێن گرۆپا “سولتان موراد” دەست دانینە سەر 3300 دارێن زەیتوونان ل گوندێ کۆتانا یێ ناڤچەیا بلبلێ.
ل گۆری رەوانگەھێ، گرۆپێن چەکداران ھەروھا دەست دانینە سەر 300 دارێن زەیتوونان ل گوندێ شێخۆرزێ، 70 دارێن گوندێ شێخ بلا و 200 دارێن ل گوندێ دوملیا.
رەوانگەھێ دا زانین ژی، چەکدارێن ئۆپۆزیسیۆنا سووریەیێ ب بھانەیا پشتەڤانیکرنا ل غەززەیێ، باجا %2 ل سەر بەرھەمێن زەیتوونان سەپاندیە و ب دارێ زۆرێ وێ باجێ ژ جۆتکاران دستینە.
ل ناڤچەیا شیێ ژی چەکداران 16 دارێن زەیتوونان یێن وەلاتیەکی ژ گوندێ غازیانا دزین و پشترە ئەو دار برین و برن.
ل گوندەوارێ عەفرینێ ژی، 125 دارێن زەیتوونان، 100 دارێن ھناران و 18 دارێن گووزان ژ ئالیێ چەکداران ڤە ھاتن برین و دزین.
ژ دەما داگیرکرنا ھەرێما عەفرینێ ژ ئالیێ ئارتێشا ترکیەیێ و گرۆپێن چەکداران ڤە د ئادارا 2018 دە، ژ بلی تاوانێن کوشتن، رەڤاندن، دزی و تالانا مال و ملکێن وەلاتیێن کورد، گرۆپێن چەکداران دەست دانینە سەر ب ھەزاران دار و زەڤیێن کۆچبەرێن کورد، زەیت و زەیتوونان ددزن و باجێن گران ل سەر بەرھەمێن چاندنیێ فەرز دکن.
ھەرێما عەفرینێ کو ب دارێن زەیتوونان ناسکرییە و نێزیکی 20 ملیۆن دارێن زەیتوونێ لێ ھەنە، د چەند سالێن بۆری دە و ل گۆری مەدیایا ناڤدەولەتی، بەرھەمێن زەیتوونان بوونە چاڤکانیەکا داھاتێ ژ بۆی گرۆپێن چەکدار.
