ئیران ل رۆژئاڤایێ کوردستانێ و ل هەرێمێن د بن دەستهلاتداریا رەژێما سووریێ دە ب پەرپرسێن پەیەدێ-پەکەکێ رە دجڤە و داخوازا هەماهەنگیا زێدەتر ژ وان دکە.
چاڤکانیێن دارکا مازی ل رۆژئاڤایێ کوردستانێ ئەشکەرە کرن، رایەدارێن ئیرانێ د چارگۆشەیا ئەولەهیێ یا رەژیمێ ل قامیشلۆ و حەسەکێ ب ئاوایەکی بەردەوام ب بەرپرسێن لەشکری و ئەولەهیێ یێن پەیەدێ-پەکەکێ رە دجڤە.
چاڤکانیێن مە ئەشکەرە کرن، ل باژارۆکێ نبل و گوندێ زەهرا یێ سەر ب پارێزگەها ئدلبێ ڤە کو پرانیا نیشتەجیهێن وێ شیعە مەزهەبن، ئیرانێ پێوەندیێن هەری بهێز ب پەیەدێ رە چێکرنە و ل ڤان ناڤچەیان ئالیکاریێن زێدە یێن لەشکری پێشکێشی یەپەگێ و هەسەدێ کرنە و دکە، ب ئاوایەکی کو ڤان هیزان وەکە بەشەک فەرمی ژ هێزێن خوە یێن چەکدار دبینە.
هەر وەها تەکەز کرن، ئیرانێ ل رۆژئاڤا کوردستانێ داخواز ژ پەکەکێ کریە کو وەکە ناڤچەیا تل رفعەت یا سەر ب پارێزگەها حەلەبێ ڤە، ل رۆژهلاتێ رووبارێ فوراتێ ژی تێکلی و هەماهەنگی د نێڤبەرا وان دە پێتر هەبە و ژ ئالیێ پێدانا زانیاریێن ئیستخباراتی پێتر ئالیکاریا هەڤدو بکن، ل باکورێ باژارۆکێ منبجێ ژی، ملیسێن سەر ب ئیرانێ تێکلی و هەماهەنگیەکە هەری بهێز یا لەشکری و ئەولەهی ب هەسەدێ رە هەیە.
ئیرانێ ب ئالیکاریا پەکەکێ تۆڕەکا بازرگانیا ماددەیێن هشبەر یا بەرفرەهـ ل سووریێ چێکریە
ل گۆر ئاگاهیێن تایبەت یێن دارکا مازی، تێکلیێن ئیرانێ ب پەکەکێ رە ل رۆژئاڤا کوردستانێ ب تەنێ د وارێ وەرگرتن و پێدانا ئاگاهیێن ئیستخباراتی دە نینە، بەلکو تێکلیێن وان تەڤ سینۆر دەرباس کرنە، ب ئاوایەکی کو ئیران و هەژمارەک ژ کادرۆیێن پەکەکێ و بەرپرسێن پەیەدێ ل باکورێ رۆژهلاتێ سووریەیێ بازرگانیا ماددەیێن هشبەر ژی دکن، ئەڤ کەسانە چەندین جورەیێن ماددەیێن هشبەر ژ ئیرانێ دەرباسی سووریێ، ئیراقێ و لبنانێ دکن، ژ وان ژی “کریستال، سمیسومید کو ل سەر شێوەیێ توزێ تێ بەرهەڤکرن، حەبێن زولام و کیبتاگۆن”.
حەبێن کیبتاگۆن ل ناڤچەیێن د بن دەستهلاتا رەژێما سووریێ و میلیشیایێن سەر ب ئیرانێ ڤە ب تایبەتی ل سینۆرێ پاریزگەها دێرازوورێ تێن بەرهەمانین و ب هەڤکاریا هەژمارەک بەرپرس و بازرگانێن سەر ب پەکەکێ و رەژێما سووریێ و میلیشایێن سەر ب ئیرانێ ڤە دەرباسی ناڤچەیێن د بن دەستهلاتا رێڤەبەریا خوەسەر یا رۆژئاڤا کوردستانێ و ناڤچەیێن د بن دەستهلاتا گرۆپێن چەکدار یێن سەر ب ترکیێ ژی تێن کرن.
ئەڤ جوورەیێ حەبێ ژ بەر ئەرزانیا نرخێ وێ و هێسانیا هلگرتنا وێ، ل ناڤچەیێن د بن دەستهلاتداریا رێڤەبەریا خوەسەر ب هێسانی ب دەست دکەڤن، د ناڤا چەکدارێن هەسەدێ دە ژی ب تایبەت جوانێن د ناڤا رەفێن هەسەدێ دە ئەڤ حەبە تێن بکارئانین و هەیا نها هەسەدە نەکاریە ڤێ یەکێ کۆنترۆل بکە.
