پارێزگاھیا وانێ ب داخویانیەکا نڤیسکی راگھاند کو ل تەڤاھیا باژێری ھەموو چالاکی، مەش و خوەپێشاندان ھاتنە قەدەغەکرن.
ل گۆری داخویانیێ، ھەموو جورەیێن خوەپێشاندان، مەش، گرەڤێن برچیبوونێ، ڤەدانا کۆنان و چالاکیێن ب ڤی ئاوایی، 4 رۆژان ل وانێ قەدەغە نە.
د داخویانیێ دە ھات گۆتن، “ب ئارمانجا پاراستنا ئەولەکاریا جان و مالێ وەلاتیان، ژناڤبرنا پلانێن رێخستنێن تەرۆرێ، پاراستنا ئەولەھیا مللی و تەندورستیا گشتی، پاراستنا ئارامییا خەلکێ و ئانینا ئارامیێ، رێگرتن ل تاوان، پاراستنا ماف و ئازادیێن خەلکێ و رێگرتن ل ھەر بوویەرەکە دن، بریارا قەدەغەیا خوەپێشاندان و چالاکیێن دن ھاتیە دایین.”
قەدەغەیا چالاکیان دەمژمێر 00:00ێ رۆژا 17 مژدارێ دەست پێ کریە و 4 رۆژان ھەموو چالاکی ھاتنە قەدەغەکرن، ژ بلی وان چالاکیێن کو پارێزگاری و قەیماقامتیێن ناڤچەیان دەستوورێ ددن وان.
ئەڤ قەدەغە د دەمەکێ دە بریارە HEDEP، ئیرۆ 18 مژدارێ ل گەلەک باژارێن ترکیێ و باکورێ کوردستانێ ژ بۆ راکرنا تەجریدا ل سەر رێبەرێ زندانیکری یێ پەکەکێ عەڤدللا ئۆجالان چالاکیان بکە.
