سەرۆکوەزیرێ هەرێما کوردستانێ مەسروور بارزانی ئیرۆ 20ێ مژدارا 2023ان د چارەمین کۆربەندا ئاشتی و ئاساییشا رۆژهلاتا ناڤین دە کو ژ ئالیێ زانینگەها ئامەریکی یا کوردستانێ ل دهۆکێ ڤێ تێ لدارخستن، گۆتارا دەستپێکێ پێشکێش کر.
سەرۆکوەزیر مەسروور بارزانی گۆت: «کێفخوەشم کو کەسێن بەشدار ژ چەند وەلاتێن جودا هاتنە. دۆستێن ژ وەلاتێن جیران و دوور، ئەز بخێرهاتنا وە دکم و هێڤی دکم کو تێکلیێن مە کوورتر ببن».
ئاماژە ب وێ کر: «د رۆژەڤا کو ژ ئالیێ ئۆرگانیزاتۆرێن کۆربەندێ ڤە هاتیە دانین دە، پرسگرێکێن کو ئەم هەموو رۆژانە رووبروویێ وان دبن هەنە. مژارێن وەکی گوهەرینا کەشووهەوایێ، کۆچبەرییا گرسەیی، توندرەوی و مەبەستێن وێ، بەردەوامیا چاڤکانیێن خوەزایی و پەرگالێن رێڤەبرنێ، دێ بێنە گۆتووبێژکرن. ئەز پێشبینیا وێ دکم کو هن گۆتووبێژ دەربارێ بریار و بژاردەیێن سیاسی دە بێنە کرن. جڤین و نیقاشێن وها یێن رەوشەنبیر و پسپۆران، دکارن ببن ئالیکار کو ئەنجامێن باش وەرن بدەستخستن».
سەرۆکوەزیر گۆت: «دڤێ ئەم ئامادە بن کو تێبگهیژن و بپەژرینن کو هن مژارێن کو ل ڤر وەرن نیقاشکرن، ژ بۆ مە هەموویان مەترسینە. زێدەبوونا گەرماهیا گۆزەمینێ دێ ئەنجامێن پر خەتەرناک ژ بۆ هەرێما مە و جیهانێ چێبکە، بێئەولەهیا خوارنێ، کێمبوونا ئاڤێ و کۆچبەرییا گرسەیی لەزتر بکە. ئەڤ پرسگرێک ژی نابن وەرن دەرەنختن. پێلێن گەرماهیێ و لەهی زێدەتر بوونە. ل گۆری نیشانێن هەری داوی، پێشبینیێن بلندبوونا پلەیا گەرمێ ل رۆژهلاتا ناڤین پر نێزیکن کو روو بدن. پێدڤییە کو ئەم کارەکی چێتر بکن، دا کو رێ ل بەر بەلاڤبوونا کاربۆنێ بگرن».
تەکەز کر ژی: «نها نە دەما کو مرۆڤ خوە ژ بەرپرسیاریێ ڤەدزن ئان ژی بێدەنگ بمینە و پرسگرێکان دوور بخن. دڤێ ئەم ژ بۆ بەرژەوەندییا گشتی کار بکن، بەری هەر تشتی وەک هەموەلاتی، لێ ب پیڤانەکە جیهانی کار بکن. د رووبرووبوونا دژواریێن کو ئەم هەمی پێ رە رووبروونە، دڤێ هەست ب وێ بکن کو جهێ ئەم لێ دژین، دێ ئەنجامێن خراب ل سەر مە هەبن. وەک میناک، کوردستان نکارە ژ ئەنجامێن گەرمبوونا کویتێ رزگار ببە».
سەرۆکوەزیر مەسروور بارزانی د بەشەکە دن یا گۆتارا خوە دە گۆت: «مە هەموویان دیمەنێن تراژیکێن سڤیلێن بێگونەهـ، زارۆک و ئەختیار دیتنە کو بوونە قوربانیێن شەرەکی دن یێ وێرانکەر. دڤێ ئەڤ دیمەن مە شیار بکن. توندیا کو ئەم دبینن قەت نە چارەسەرینە و ئاشتیێ نایینە، لێ دبە سەدەما بەردەوامیا وێرانی و کارەساتان».
