ئیرۆ 21/11/2023 چاپەمەنیا ئیراقێ راگەھاند، نێزیکی باژارۆکێ ئەبوغورێب یا ل رۆژئاڤایێ بەغدا یا پایتەختا ئیراقێ، درۆنەکی ئۆتۆمۆبیلا چەکدارێن حزبوللاھێ ئارمانجا کریە.
چاڤکانیەکی ئاشکەرا کر، درۆنەکی ئۆتۆمۆبیلەکا حزبوللاھێ د ناڤبەرا ھەردو ناڤچەیێن نەسر و سەلام ل ئەبوغورێب یا ل رۆژئاڤایێ بەغدایێ کریە ئارمانج و د وێ دەمێ دە ھەژمارەک ئۆتۆمۆبیلێن میلیشیایێن حزبوللاھێ د رێ دە بوون و ل ناڤچەیا سرسار ڤە دچوون بۆ ئەبوغورێب و ئۆتۆمۆبیلا وان بوو ئارمانجا ئێریشێ و ھات بۆمبەباران کرن. لێ ھین نایێ زانین چەند کەس د وێ ئۆتۆمۆبیلێ دە بوونە.
ھات راگەھاندن د ئۆتۆمۆبیلێ دە چەک و تەقەمەنی ھەبوویە و پشتی ئۆتۆمۆبیل ژ ئالیێ درۆنێ ڤە ھاتیە بۆمبەباران کرن دەنگەک بلند ھاتیە بیھیستن.
پشتی ل غەزەیێ شەر د ناڤبەرا حەماس و ئیسرائیلێ دە دەستپێ کر، بنکەیێن لەشکەری یێن ئامەریکایێ ل ئیراق و سووریێ دبن ئارمانجا ئێریشان و میلیشیایێن چەکدار ژی چەند جارەکان بەرپرسیارتیا خوە یا وان ئێریشان راگەھاندن.
بەری نھا ژی وەزارەتا بەرەڤانیا ئامەریکایێ (پەنتاگۆن) راگەھاند، ژ 17 جۆتمەھا 2023 ھەتا 17 مەھا مژدارێ، 58 جاران بنکەیێن ئامەریکایێ ل ئیراق و سووریێ بوونە ئارمانجا ئێریشان.
