بەردەڤکێ وەزارەتا دەرڤە یا قەتەرێ دبێژە، “دانووستاندنێن گرێدایی بجھانینا ئاگربەستا مرۆڤی یا غەززەیێ ب رەنگەکی باش تێن مەشاندن و د چەند دەمژمێرێن بهێت دە دچە د وارێ بجھانینێ دە”.
ئیرۆ رۆژا پێنجشەمێ، 23 مژدارا 2023، بەردەڤکێ وەزارەتا دەرڤەیا قەتەرێ ماجد ئەنساری ژ بۆ مەدیایا فەرمییا وەلاتێ خوە راگەھاند، “دانووستاندنێن قەتەر و مسرێ ژ بۆ بجھانینا ھوورکاتیێن پلانا ئاگربەستا مرۆڤی یا غەززەیێ د ناڤبەرا حەماس و ئیسرائیلێ دە بەردەوامن و ب رەنگەکی ئەرێنی دمەشن”.
ب گۆتنا ئەنساری، “د دەما چەند دەمژمێرێن بهێت دە ئاگربەستا مرۆڤی یا غەززەیێ دچە د وارێ بجھانینێ دە”.
وەکی کو بەردەڤکێ وەزارەتا دەرڤەیا قەتەرێ ئاماژە دایە، “بزاڤ لگەل حەماس، ئیسرائیل، ئامەریکا و مسرێ بەردەوامن ژ بۆ پشتراستبوونێ ژ بجھانینا بلەزا وێ ئاگربەستێ و دابینکرنا ھەر تشتەکی پێدڤی ژ بۆ پشتراستبوونێ ژ پابەندیا ھەردو ئالیان ل سەر وێ لھەڤکرنێ.”
ئەڤ د دەمەکێ دەیە کو دۆھ رۆژا چارشەمبێ، 22 مژدارا 2023، وەزارەتا دەرڤەیا قەتەرێ د راگەھاندنەکێ دە ئەشکەرە کر، ب ھەڤپاری لگەل مسر و ئامەریکایێ د ناڤبەینکاریێ دە ژ بۆ راگەھاندنا ئاگربەستا مرۆڤی د ناڤبەرا ئیسرائیل و حەماسێ دە و لھەڤگوھەرتنا ھەژمارەکا ئێخسیر و رەڤاندیان سەرکەفتی بوون.
د وێ راگەھاندنێ دە ھاتیە کو قۆناغا یەکێ یا لھەڤکرنێ ئازادکرنا 50 رەڤاندیانە ژ ئالیێ حەماسێ ڤە، ل بەرانبەری ھەژمارەکە ژن و زارۆکێن فلستینی کو ل زیندانێن ئیسرائیلێ ھاتنە زیندانیکرن.
وەزارەتا دەرڤەیا قەتەرێ ھەروەسا ئاماژە دا، د قۆناغا بهێت دە ھەژمارەکا دن ژی یا ئێخسری و رەڤاندیان دێ ل ھەڤ بێن گوھەرتن. ئەو یەک ژی بەرچاڤ کر، ئەڤ ئاگربەست رێیێ ددە کو ھەژمارەکا زێدەتر یا کاروانێن مرۆڤی و ئالیکاریێن ھاوارھاتنێ بچن غەززەیێ.
