بەرپرسەکی وەزارەتا بەرەڤانیێ یا ئه‌مه‌ریكایێ راگهاند، ژ 17ێ جۆتمەهێ ڤە هێزێن وان یێن ل سووریە و ئیراقێ، 73 جاران راستی ئێرشان هاتنە.
وی بەرپرسی کو ناڤێ خوە ئاشکەرە نەکریە دوهی 24ێ مژدارێ ژ «فۆكس نیوزێ» رە دیار کر، هێزێن ئه‌مه‌ریكی ل سووریێ 37 جاران و ل ئیراقێ ژی 36 جاران راستی ئێریشێن ب مووشەک و درۆنان هاتن.
جیگرا بەردەڤکا وەزارەتا بەرەڤانیا ئه‌مه‌ریكایێ سابرینا سینگ ژی سێشەما بۆری گۆتبوو، هێزێن وان ل ئیراق و سووریێ 66 جاران راستی ئێریشان هاتنە.
سابرینا پشتراست کر، د ئەنجاما وان ئێریشان دە 62 لەشکەرێن ئه‌مه‌ریكی ل ئیراق و سووریێ بریندار بوونە.
د چەند رۆژێن بۆری دە، پشتی شەرێ د ناڤبەرا ئیسرائیل و حەماسێ دە، ئێریشێن ل سەر بارەگەهێن لەشکەری یێن ئه‌مه‌ریكایێ ل سووریە و ئیراقێ زێدە بوونە.
ل ئیراقێ 2500 و ل سووریێ ژی 900 لەشکەرێن ئه‌مه‌ریكایێ هەنە. ژ نیڤێ مەها جۆتمەهێ ڤە ژی، 73 ئێریش ل دژی هێزێن ئه‌مه‌ریكی و هەڤپەیمانیا ناڤدەولەتی یا ل دژی داعشێ ل وان هەر دو وەلاتان هاتنە کرن.
ل هەمبەر ڤێ یەکێ، ئه‌مه‌ریكا چەندین جاران ملیسێن ئالیگرێن ئیرانێ ل ئیراق و سووریێ بۆمبەباران کرنە. فەرمانداریا ناڤەندی یا ئه‌مه‌ریكایێ ژی رۆژا 22ێ مژدارێ دو بارەگەهێن ملیسان ل ئیراقێ بۆمبەباران کربوون.
پشترە ژی سەرۆکوەزیرێ ئیراقێ محەمەد شه‌یاع سوودانی ژی ئەڤ ئێریشێن ئه‌مه‌ریكایێ یێن ل سەر ملیسان شەرمەزار کر و گۆت، ئەڤ بنپێکرنا سەروەریا ئیراقێ یە و هەولا تێکدانا ئەولەهی و ئارامیێ یە».
