تەرمێ 2 کۆچبەرێن کورد یێن ژ باژارێ قامشلۆ یا رۆژئاڤایێ کوردستانێ، ل دارستانێن بولگاریا هاتن دیتن.
هەر یەک ژ عارف تاجدۆ تاهر و محەمەد عزەدین تاهر، بەریا چەند رۆژان ب ئارمانجا کو خوە بگهینن ئەورۆپایێ، ژ ترکیێ دەرکەتبوون و د رێ دە پێیوەندی ب وان رە هاتبوو برین، ئیرۆ ژی مری هاتن دیتن.
عزەدین تاهر کو باڤێ جوانێ ب ناڤێ محەمەدە ژ «ئارک» رە گۆت: «رۆژا 16ێ مژدارێ کورێ من و برایێ من عارف ژ ترکیێ بەر ب ئەورۆپایێ ڤە دەرکەتن، لێ ئەو د دارستانێن سربیا دە ئاسێ مان، ئیرۆ ژی تەرمێن وان ل دارستانێن بولگاریا هاتن دیتن».
عزەدین تاهر گۆت ژی: «ل گۆر زانیاریێن کو گهیشتنە مە، ئەو ژ ئالیێ پۆلیسێن سربیا ڤە هاتبوون گرتن، لێ تا نها سەدەما مرنا وان نایێ زانین».
هەروها گۆت: «ئەم ل بەندا لێکۆلینێن دادوەریا لەشکەری یا بولگاریانە، دا کو سەدەمێن مرنێ دیار بکن».
ژ بەر رەوشێن ئەولەهی و ژیانێ یێن زەهمەت، پێلا کۆچبەریێ بەردەوامە، رۆژانە ب دەهان وەلاتیێن رۆژئاڤایێ کوردستانێ بەرێ خوە ددن وەلاتێن ئەورۆپایێ، د رێ دە ژی راستی هەموو جورێن مەترسیان تێن و هن ژی جانێ خوە ژ دەست ددن.
