کۆمیسیۆنا ئەوروپا ل سەر رەوشا تێکلییێن سییاسی، ئابۆری و بازرگانی یێن یەکیتییا ئەورووپایێ و ترکییێ راپۆرا خوە یا سالا 2023 دیار کر.
د راپۆرێ دە ھات گۆتن کو “ژ بەر رەوشا گران یا مافێن مرۆڤان و یاسایا ناڤخوەیی، بجیھنەئانینا بریارێن دادگەھا مافێن مرۆڤان یا یەکیتییا ئەورۆپایێ، تێکلییا یەکیتییا ئەورۆپایێ-ترکیێ و گەلەک سەدەمێن دن ل پێشبەری ئەندامەتییا ترکییێ دبن ئاستەنگ دڤێت بێن چارەسەرکرن”.
بەرپرسێ سییاسەتا دەرڤە و ئەولەکارییا یەکیتییا ئەورووپایێ جۆسێپ بۆڕەل و بەرپرسێ جیرانتی و بەرفرەھکرنا ئەورووپایێ ئۆلیڤەر ڤارھەلی، راپۆرا سەر ترکیێ ل بروکسەلێ ل ناڤەندا گشتی ب پرێس کۆنفەرانسەکێ پێشکەش کرن.
جۆسێپ بۆڕەڵ دەستنیشان کر کو دییالۆگا سەر سەروەرییا یاسایێ و مافێن بنگەھین دێ ببە بەشەکا بنگەھین یا تێکلییا یەکیتییا ئەورۆپایێ و ترکیێ.
د راپۆرا 18 رووپەلی دە ھات ئەشکەرە کرن کو ژ بلی تێکلییێن دوالی و ئابۆری، گەلەک خال ھەنە کو چارچۆڤەیا پەیوەندییێن یەکیتییا ئەورۆپایێ- ترکیێ ئالۆز و دژوار دکن.
داخویانییێن ل سەر رەوشا رۆژھلاتا دەریایا سپی، پرسگرێکا قبرسێ، د شەرێ رووسیا و ئوکراینا دە ھەلوەستا ترکیێ، بەرفرەھکرنا ناتۆیێ، ھەلوەستا ترکیێ یا ل سەر مژارێن سییاسەتا دەرڤە و ھەرێمی، پشتگرییا حەماس و دژبەرییا ئیسرائیلێ و رەوشا مافێن مرۆڤان یا ناڤخوەیی و سەروەرییا یاسایێ و گەلەک سەدەمێن دن ژ بۆ ئەندامەتییا ترکیێ یا د یەکیتییا ئەورۆپایێ دە سەدەمێن بەربچاڤن.
بۆرەڵ و ڤارھەلی دەستنیشان کرن کو ھاوردۆرەک ئارام و ئەولەدار یا ل رۆژھلاتا دەریا سپی و پێشخستنا تێکلییەک ھەڤکار و سوودمەندێن لگەل ترکیێ، د بەرژەوەندییا ھەموو ئالییان دەیە.
بۆڕەڵ و ڤارھەلی ژ بۆ چارەسەرییێ ژ ترکییێ پابەندبوونا ب پەیمانێن ناڤنەتەوی و بنپێنەکرنا مافێن سەروەری یێن ئەندامێن یەکیتییا ئەورۆپایێ خوەستن.
د بەشا دویەمیا راپۆرتێ دە سییاسەتا ترکیێ یا ل دەرڤەیی هەرێمێن یەکیتییا ئەورۆپایێ ژی ھات نرخاندن، وەک ل سووریێ، ئیراق، ئیران و ئەرمەنستان.
بۆڕەڵ و ڤارھەلی دەستپێکرنا پەیوەندییێن ترکیێ و رێژیما سووریێ ب ناڤبەینکارییا رووسیا وەک دژبەری سییاسەتا یەکیتییا ئەورۆپایێ رەخنە کرن.
بۆڕەڵ و ڤارھەلی ب ئیدیعایا دژی چەکدارێن پارتییا کارکەرێن کوردستانێ (پەکەکێ) بال کشاندن سەر بەردەوامییا ئۆپەراسیۆنێن لەشکەری یێن ترکیێ و ھەبوونا لەشکەرییا ل سوورییێ و ھەرێما کوردستانا ئیراقێ.
بۆڕەڵ ب بیر خست کو حکوومەتا ئیراقێ ئۆپەراسیۆنێن ترکییێ ب توندی شەرمەزار دکە.
د راپۆرێ دە ھات گۆتن “تەڤی کو یەکیتییا ئەورۆپایێ، پەکەکێ وەک رێخستنەکا تەرۆریست دبینە، وەلاتێن ھەرێمێ تەشویق دکە کو چالاکییێن ل دژی تەرۆرێ رێک بێخن، ب پیڤان و ب رێزگرتنا تام یا سەروەرییا یاسایێ تەڤبگەرن”.
