پارتییا وەلاتپارێزێن کوردستانێ (PWK) ب بۆنەیا 10 بەرچلە رۆژا مافێن مرۆڤان یا جیھانێ، پەیامەک بەلاڤ کر و تێ دە راگھاند، “ئەم بانگ ل نەتەوەیێن یەکبوویی و وەلاتێن تێکلداری وێ و پارێزڤانێن مافێن مرۆڤان دکن: گوھ بدن قێرینا مرۆڤی یا گەلێ کورد کو ژ 50 میلیۆنان زێدەترن. ژ بۆ بجیھانینا مافێن مرۆڤی یێن بنگەھین یێن گەلێ کورد.”
ھەروەھا PWk بانگ ل دەولەتێن ترکیێ، ئیران، ئیراق و سووریێ دکە کو پێدڤیێن بەیاننامەیا گەردوونی یا مافێن مرۆڤان بجیھ بینن.
داخویانیا نڤیسینگەها راگەھاندنێ پارتییا وەلاتپارێزێن کوردستانێ:
ئەم بانگی نەتەوێن یەکبوویی و دەولەتێن جیھانێ دکن کو بەیاننامەیا مافێن مرۆڤان یا جیھانێ بجیھ بینن.
رۆژا 10 چلەیا پێشین یا 1948 دە بەیاننامەیا گەردوونی یا مافێن مرۆڤان یا ژ 30 خالان پێکھاتی، د لژنەیا گشتی یا نەتەوەیێن یەکگرتی دە ھاتە پەژراندن و ئەڤ رۆژ وەکە رۆژا مافێن مرۆڤان یا جیھانێ تێ پیرۆزکرن.
بەیاننامەیا گەردوونی یا مافێن مرۆڤان پشتی شەرێ دویەمێ جیھانێ ھاتە پەژراندن کو د وێ دەمێ دە مافێن مرۆڤان گەلەک دھاتە بنپێ کرن.
پشتی رووخاندنا نازیزم و فاشیزما کو د دیرۆکا مرۆڤاھییێ دە روورەشییەکە مەزنە، ژ بۆ کو مرۆڤاھی جارەکە دن تووشی رەوشەکە وەھا نەبە، نەتەوێن یەکبوویی ئەڤ بەلاڤۆکە پەسند کربوو.
لێ د دەمەکە کورت دە، دیار بوو کو وان دەولەتێن کو بەیاننامەیا گەردوونی یا مافێن مرۆڤان قەبوول کربوون، وان ب خوە ئەڤ بەلاڤۆکە بنپێ کرن.
پشتی شەرێ دویەمێ جیھانێ، دو بلۆک دەرکەتن ھۆلێ. بلۆکا رۆژئاڤا و بلۆکا رۆژھلات. مخابن ھەردو بلۆکان ژی دانەزانا گەردوونی یا مافێن مرۆڤان ژ بۆ بەرژەوەندییێن خوە بکار ئانین. ھەر بلۆکەکێ مافێن مرۆڤان بنپێ دکرن، لێ ل ھمبەری بنپێ کرنا مافێ مرۆڤان یا د بلۆکا دن دە دبوو پاراستڤانێ بەیاننامەیا گەردوونی یا مافێن مرۆڤان.
د ئەسلێ خوە دە ھەردو بلۆکان ژی بەیاننامەیا گەردوونی یا مافێن مرۆڤان بنپێ دکرن. ب تایبەتی ژی د دەربارێ مللەتێن بێ دەولەت دە، ھەر دو بلۆکان لی مافێن مرۆڤان، مافێن مللەتان پاشگوھ دکرن، لێ خوەدی دەرنەدکەتن و چاڤێن خوە ژ بنپێ کرنا مافێن مرۆڤ و نەتەوییێن مللەتێن بێ دەولەت رە دنقاندن.
پشتی کو سیستەما دو بلۆکی رووخا ژی ئەو نەھەقییا کو ل مللەتێن بێ دەولەت ژی، ل گەلێن دن ژی دھاتە کرن، بنپێ کرنا مافێ مرۆڤان ژی ھەر بەردەوام بوو.
ئیرۆ ھەگەر ئەم بەحسا مللەتێن کو مافێن وی یێ مرۆڤی و نەتەوی تێ بنپێ کرن بکن، بێیی تەرەدوت، ئەم دێ ببینن کو مللەتێ کورد د رێزا یەکەم دەیە.
جھێ مخابنییە کو یەکەمین سازیا کو بەیانناما مافێن مرۆڤان یا جیھانێ بنپێ کریە، پێویستییێن وێ بجیھ نەئانییە و ئەڤ بەیاننامە نەشۆپاندیە، دیسا نەتەوەیێن یەکبوویی بخوەیە.
د سەری دە خوشک و برایێن مەیێن کوردێن ئێزدی، لێ ھەموو مللەتێ کورد ل بەر چاڤێن نەتەوێن یەکبوویی، تووشی ئێریشێن ھۆڤانەیێن داعشێ بوون. ئیرۆ ژی ل بەر چاڤێن نەتەوێن یەکبوویی، مللەتێ کورد تووشی ئێریشان، بنپێ کرنێن مافێن مرۆڤی و نەتەوی دبە.
نها ئەم دپرسن: ئەم دەمێن کو بەرییا ئیمزەکرنا ڤێ بەیاننامێ دانین ئالییەکی، ژ 10 چلەیا پێشینا 1948 و ڤر دە، ژ بۆ زمانێ کوردی یێ قەدەغەکری، ژبۆ ماف و ئازادیێن نەتەوەیی یێن کوردان یێن بنپێکری، ژ بۆ کۆمکوژی و قرکرنێن کو ل سەر کوردان ھاتنە پێکانین، ژ بۆ ئیشکەنجە و زندانیکرنان، ژ بۆ مافێن ئازادیا فکراندن و برێخستنکرنێ یێن بنپێ بوویی یێن گەلێ کورد، نەتەوەیێن یەکبوویی ھەتا نھا چ کریە؟
ژ بۆ کوردێن کو مافێن وان د ھەر 30 خالێن بەیاننامەیا گەردوونی یا مافێن مرۆڤان دە ب ئاوایەکی ئەشکەرە ھاتنە بنپێکرن نەتەوێن یەکبوویی ھەتا نھا چ کرییە؟
ئەم د سالڤەگەرا 70 یا پەژراندنا رۆژا گەردوونی یا مافێن مرۆڤان دە بانگ ل نەتەوەیێن یەکبوویی و وەلاتێن تێکلداری وێ و پارێزڤانێن مافێن مرۆڤان دکن: “گوھ بدن قێرینا مرۆڤی یا گەلێ کورد کو ژ 50 میلیۆنان زێدەترن. ژ بۆ بجیھانینا مافێن مرۆڤی یێن بنگەھین یێن گەلێ کورد، ژ بۆ بدەستخستنا مافێن کوردان یێن کو د ناڤ بەیاننامەیا گەردوونی یا مافێن مرۆڤان دە ھاتنە پێناسەکرن، ئەم بانگ ل وە دکن کو دەملدەست گاڤان باڤێژن”.
ھەروەھا ئەم بانگ ل دەولەتێن ترکیە، ئیران، ئیراق و سووری دکن کو پێدڤیێن بەیاننامەیا گەردوونی یا مافێن مرۆڤان بجیھ بینن.
10/12/2023
نڤیسینگەها راگەھاندنێ یا پارتییا وەلاتپارێزێن کوردستانێ (PWK)
