حەشدا شەعبی ل مووسلێ کارتێن دەنگدانێ ژ خەلکێ دکرە
بزاڤا بابلیۆن یا ب سەرۆکاتیا رەیان کلدانی و بالێ وێ یێ سەربازی “لیوایا 50” یا حەشدا شەعبی ئەڤ دەما 7 مەهانە کارتێن دەنگدانێ ژ خەلکێ مووسلێ دکرن.
چاڤکانیێن تایبەت یێن پێگەها دارکا مازی ئەشکەرە کرن، ژ دەستپێکا مەها 5/2023 هەیا نها بزاڤا بابلیۆن یا ب سەرۆکاتیا رەیان کلدانی کارتێن دەنگدانێ ژ خەلکێ سەنتەر و رۆژئاڤا و باکورێ مووسلێ دکرن.
چاڤاکنیێن مە ئەشکەرە کرن، کەسێن کو سەرپەرەشتیا کرینا کارتێن دەنگدایینێ دکن یەک ژێ بەرپرسێ ئەولەهیا لیوایا 50 یە و ناڤێ وی “زیا محەمەد ئەلنەقیب ئەلتکریتی” یە کو ب کۆد ناڤێ “ئەبۆ تاها” تێ ناسکرن، یێ دن ژی جێگرێ وی یێ ب ناڤێ “ئەمجەد ئەلحەمدانی” یە کو ب کۆد ناڤێ “ئەبۆ سەیف” تێ ناسکرن، پرۆسێسا کرینا کارتێن دەنگدانێ ل نڤێسینگەها بابلیۆن یا ل تاخا ئەرپچیە یا نێزی مزگەفتا ئەلبەدیع یا باژارێ مووسلێ تێ ئەنجامدایین.
هەر وەها ئەشکەرە کرن، کەسێن کو ب کارێ کرینا کارتان رادبن ژ بۆی هەر کارتەکی 40-45 هەزار دیناران ب خوەدیێ کارتێ ددن، پشترە ب 65 هەزار دیناران ددن نڤێسینگەها بابلیۆن و هەر کەسێ هەژمارەک کارتان رادەستی نڤێسینگەها بابلیۆن دکە کۆمپیالەک ژێ رە تێ چێکرن ژ بۆی گارانتیکرنا دەنگدایینا ب بالیۆن، پرانیا کەسێن کو کارتا خوە دفرۆشن ژ تەخا هەژارن و تەڤ ب رەگەز عەرەبن.
ل گۆر ئاگاهیێن تایبەت یێن ب دەست پێگەها مە کەتین، هەیا نها نێزی 15-17 هەزار کارتێن دەنگدانێ هاتینە کرین و ئەڤ کارە هەیا نها ددۆمە، ئارمانجا سەرەکە ژ ڤی کاری دەنگ دان ب بەربژێرێ بابلیۆن یێ ب ناڤێ رەبیع یوسف ئەلیاسە.
ئەڤ ژی ناڤێن هنەک ژ وان کەسانە کو ب کارێ کرینا کارتێن دەنگدانێ ژ بۆی بزاڤا بابلیۆن رادبن:
منیف محەمەد ئلیاس ئەلجحێشی، ژ شێنیێن گوندێ ئوم کەهیف یێ سەر ب ناحیا رەبیعە یە.
خەلەف محەمەد حەموو ئەلجحێشی، ژ شێنیێن گوندێ سایر یێ سەر ب ناحیا سنوونێ یە، نها ل بادووشێ دمینە.
محەمەد محسن ئەلجحێشی، ژ شێنیێن بادووشێ یە.
سەباح سالح خەلەف، ژ شێنیێن بادووشی یە.
ئەبۆ شەعلان، ژ شێنیێن عەوینات یا سەر ب ناحیا رەبیعە یە.
سەیف ئەلجبۆری، ژ شێنیێن رجم ئەلحەدید/ مووسلێ یە.
ئەحمەد عاید ئەلجبۆری، ژ شێنیێن رجم ئەلحەدید/ مووسلێ یە.
خالد عیناد ئەلعگێدی، ژ نیشتەجیێن تاخا ئەلمەنسوور یا باژارێ مووسلێ یە.
هەر وەها هات زانین، سەرباری کرینا کارتێن دەنگدانێ کو دێ د رۆژا دەنگدانێ دە هەر کارتەک ژ بۆی خوەدیێ وێ وەرە ڤەگەراندن هەیا کو بکارە دەنگ ب کاندیدێ بزاڤا بابلیۆن یێ ب ناڤێ “رەبیع” بدە، د هەمان دەم دە کارتێن عەرەبێن هندەک کامپ و ناڤچەیێن د بن کۆنترۆلا پێشمەرگە دە ژی دکرن و د رۆژا دەنگدایینێ دە ژ بۆی وان نا ڤەگەرینن هەیا کو نەکارن دەنگێ خوە بدن، ژ بەر کو رەیان کلدانی یێ سەرۆکێ بزاڤا بابلیۆن دترسە ئەڤ خەلکە دەنگ ب کاندیدێن پەدەکێ بدن.
