بالەفرا شەری یا جورەیا سو-22 یا لەشکەری یا سەر ب سپاھا پاسدارێن ئیرانێ کەت گۆلا پەریشان یا ل باشوورێ رۆژھلاتێ ناڤچەیا کازەرون و ھات راگەھاندن بالەفرڤان ب سیستەما کورسیا فراندنێ کاریە خوە رزگار بکە.
ل ئەیالەتا فارس یا ل باشوورێ ئیرانێ بالەفرەکا شەری یا جورەیا سو-22 کەت خوارێ. ل گۆر تەلەڤیزیۆنا دەولەتێ یا ئیرانێ بالەفرا ب جورەیا سو-22 کەتیە گۆلا پەریشان یا ل ناڤچەیا کازەرونێ. ھات راگەھاندن د بوویەرێ دە چ ونداهییێن جانی چێنەبوویە.
ھەروەھا تەلەڤیزیۆنا دەولەتێ یا ئیرانێ دەربارێ بوویەرێ دە پر زێدە ئاگاھی بەلاڤ نەکرن، لێ ئاژانسا نیڤ فەرمی یا ئیرانێ تەسنیم ژی راگەھاند، بالەفرا ھێزێن ئەسمانی یا سەر ب سپاھا پاسداران بوویە.
ل گۆر نووچەیا تەسنیمێ رێڤەبەرێ گشتی یێ بالەفرگەھێن ئەیالەتا فارس فەخرەدین کەشاڤەرز ژی راگەھاندیە بالەفر نێزیکی گۆلا پەریشان یا ل باشوورێ رۆژھلاتێ ناڤچەیا کازەرونێ کەتیە خوارێ و سەدەمێ کەتنا بالەفرێ ژی ژ بەر خەرابوونەکی تەکنیکی بوویە.
بالەفرێن سو-22 ژ ئالیێ کۆمپانیا سویخۆ یا رووسیایێ ڤە تێن ھلبەراندن و ژ ئالیێ ئیرانێ ڤە ب ئاوایەکی چالاک ئەو بالەفر تێن بکارئانین.
