ئامەریکایێ پێکانینا ھەڤپەیمانیەکا ناڤدەولەتی ژ بۆ رووبرووبوونا ئێریشێن حووسیان ل دەریایا سۆر ل ژێر ناڤێ “پێشەنگیا ئەولەھیا پرنەتەوەیی” راگەھاند، ئەو ھەڤپەیمانی 10 وەلاتان ڤەدگرە، کو یەک ژ وان وەلاتەکێ عەرەبییە.
د بەیاننامەیەکا وەزیرێ بەرگریێ یێ ئامەریکایێ لیۆد ئاوستن دە ھاتیە، “ئەو وەلاتێن بزاڤێ ژ بۆ دامەزراندنا بنگەھا سەرەکی یا ئازادیا کەشتیڤانیێ دکن، دڤێت ژ بۆ بەرھنگاربوونا وان قەبخوازیان کۆم ببنێن کو ئەڤ قەوارە بەرچاڤ دکە”.
ئاوستن کو د سەردانەکێ دە ژ بۆ بەحرەینێ کو مێڤانداریا کەشتیێن ئامەریکایێ ل رۆژھلاتا ناڤین دکە راگەھاند، “وەلاتێن کو تەڤلی ڤێ ھەڤپەیمانیێ بوونە ئەڤن؛ بریتانیا، بەحرەین، کانادا، فرانسا، ئیتالیا، ھۆلاندا، نۆروێج، سیشێل و سپانیا.”
ئاماژە دا وێ یەکێ ژی کو، دێ ل باشوورێ دەریایا سۆر و کەنداڤێ ئەدەنێ چالاکیێن ھەڤپار بکن.
ئاوستن ھەروەسا گۆت، “ئەڤە قەبخوازیەکا ناڤدەولەتییە و پێدڤی کریارێن بکۆمە، لەوما ژی ئیرۆ ئەز دەستپێکرنا “ئۆپەراسیۆنا زێرەڤانێن ژیارخوەشیێ” رادگەھینم، کو پێشەنگیەکا گرنگا نوویا ئەولەھیا پرنەتەوەیی یە”.
پشتی شەرێ ئیسرایل و حەماسێ، حووسیان چەند ئێریش کرنە سەر کەشتیێن دەریایا سۆر، خوە ب درۆن و مۆشەکان ژی ئێریش کریە سەر ئیسرایلێ.
تەنێ چەند سێتان بەری راگەھاندنا ھەڤپەیمانیا ئامەریکایێ، حووسیان راگەھاند، کو ب درۆنان ئێریش کریە سەر دو کەشتیێن بارھەلگر ل دەڤەرێ.
