دوهـ ئێڤارێ کۆمسیۆنا بلند یا سەربخوە یا ھلبژارتنا یا ئیراقێ ئەنجامێن دەستپێکێ یێن ھلبژارتنێ راگھاندن و دیار کر کو لیستەیا یەکیتییا گەلێن نەینەوایێ د ئاستا مووسلێ دە 45.939 دەنگ بدەست خستنە. ل گۆر ڤێ ئەنجامێ لیستەیا یەکیتییا گەلێن نەینەوایێ 2 کورسی بدەستخستن.
یەکیتییا گەلێن نەینەوایێ د ئاساتا مووسلێ دە ژ چەندین پارتی، کەساتی و هەڤبەندیێن جوودا پێک دهات، یا هەری سەرەکە د ڤێ هەڤپەیمانیێ دە یەنەکە بوو، هەر وەها رێخستنا پەکەکێ یا ل شەنگالێ “پادێ” ژی تەڤلی ڤێ هەڤپەیمانیێ ببوو، پەکەکێ و یەنەکێ خوەست ب ڤی ئاوا ئالیکاریا هەڤدو بکن و نوونەرەکی پەکەکێ ژی بخن مەجلیسا مووسلێ دە.
پەکەکێ ب بەردەوامی د چاپەمەنیا خوە دە پشتگیریا یەنەکێ دکر ژ بۆی هلبژارتنێن ئەنجوومەنێن پارێزگەهێن ئیراقێ، ب تایبەتی ل کەرکووکێ، ب ڤێ یەکێ ب تەنێ ژی نەسەکنی، ب رێیا شاخا خوە یا باشوورێ کوردستانێ “تەڤگەرا ئازادیا جڤاتا کوردستانێ” راستەراست پشتگیری دا یەنەکێ و ژ ئالیگرێن خوە خوەست دەنگ ب کاندیدایێن یەنەکێ یێن ل کەرکووکێ بدن، ل همبەر ڤێ یەکێ ژی یەنەکێ ل شەنگالێ ئالیکاریا پەکەکێ کر کو کاندیدێ پادێ دەر بچە و دەنگێن پێویست ب دەست بخە.
سەرکەتنا کاندیدێ هەڤپەیمانیا گەلێن نەینەوایێ یێ ل شەنگالێ ب دەنگێ دەنگدەرێن ئێزدی یێن شەنگالێ ب تەنێ نەبوو، ژ بەر کو سیستەما هلبژارتنێ ب ئاوایەکێ بوو کو کاندید دکارین ل تەڤاهیا باژارێ مووسلێ د ناڤ دە ل شەنگالێ ژی دەنگا ب دەست بخن، یا راست وەکە هلبژارتنێن پارلامانتۆیا ئیراقێ یا سالا 2021 هەژمارەک هەری کێم یا ئێزدیان دەنگ ب کاندیدێن پەکەکێ دایە، بەرەڤاژی وێ یا کو پەکەکە بانگەشەیێ ژێ رە دکە.
یەنەکێ ل شەنگالێ ل همبەر ئالیکاریا پەکەکێ یا ل کەرکووکێ ژ بۆی ب دەست خستنا دەنگێن گەلێ کەرکووکێ سۆز ب پەکەکێ دابوو کو ل سینۆرێ مووسلێ ژی هەڤپەیمانیێ لگەل پادێ چێبکە و ب یەک لیستە بەشداری هلبژارتنا ببن هەیا کو بکارە کاندیدەکی پادێ بخە ئەنجوومەنا پارێزگەها مووسلێ، گەر ب ڤی ئاوا نەبوویا چ نامزەدەکی پەکەکێ وەکە هلبژارتنێن 2021 یێن پارلامانتۆیا ئیراقێ ب سەر نەدکەت.
