فەرماندەیا ناڤەندی یا ئارتێشا ئامەریکایێ پارڤە کریە، د بەرسڤا وان ئێریشان دە یێن کو ل ئیراقێ و سووریەیێ بۆ سەر بنگەھێن وان تێن کرن، چەند بنگەھێن حزبولاھێ ل ناڤ ئاخا ئیراقێ کرنە ئارمانج.
ئاماژە دایە وێ یەکێ ژی کو، ل گۆر ھەلسەنگاندنێن دەستپێکی، بنگەھێن حزبولاھێ ھاتنە وێرانکرن و چەند چەکدارێن وێ ژی ھاتنە کوشتن، چ زرار ژی نەگەھشتنە وەلاتیێن سڤیل.
تەکەز ل سەر وێ یەکێ ژی کر کو، ئامەریکا ھەلسەنگاندنێ ژ بۆ بەردەوامبوونا ل سەر بەرسڤێن ب وی رەنگی دکە و ھێزێن خوە دپارێزە.
ھەروەسا فەرماندەیا ناڤەندی یا ئارتێشا ئامەریکایێ پارڤە کریە کو، ئێڤارا دۆھ (دوشەمبێ، 25 بەرچلەیا 2023) چەکدارێن حزبولاھێ ئێریش کریە سەر بنگەھێن ھەڤپەیمانان ل ھەولێرێ و سێ کەس بریندار بوونە.
ژ ئالیەکێ دن ڤە وەزارەتا بەرگریێ یا ئامەریکایێ (پەنتاگۆن) ژی راگەھاندیە، ئێریشێن وان بەرسڤێن وان ئێریشانن یێن کو ژ ئالیێ کۆمێن چەکدار ڤە بۆ سەر ھێزێن وان ھاتنە کرن.
پەنتاگۆنێ ھەروەسا راگەھاندیە، ئێریشێن ل سەر کۆمێن چەکدار ل ئیراقێ ب بریارا سەرۆکێ ئامەریکا جۆ بایدن بوون.
ئەڤ د دەمەکێ دەیە کو دۆھ (دوشەمبێ، 25 بەرچلەیا 2023) دژەتەرۆرا کوردستانێ پارڤە کربوو، “ب رێیا درۆنەکا بۆمبەکری ئێریشی بنگەھا سەربازی یا ھەڤپەیمانیا ناڤدەولەتی یا دژی داعشێ ل بالافرخانەیا ناڤدەولەتی یا ھەولێرێ ھات کرن”.
بەردەڤکێ فەرماندەیا گشتی یا ھێزێن چەکدار ل ئیراقێ یەحیا رەسوول ژی ئێریشا درۆنی یا نێزی بالافرخانەیا ناڤدەلوتی یا ھەولێرێ شەرمەزار کر و وەکی کریارەکا تەرۆرستی وەسفاند و گۆت، “ئەڤ کریارێن تاوانکاری زرارێ دگەھینن بەرژەوەندیێن ئیراقێ و پەیوەندیێن ھەرێمی و ناڤدەولەتی”.
