سه‌رۆكێ ئیرانێ دچە ترکیێ: پژاک و دەریێن سینۆری تێن گۆتووبێژکرن

سەرۆککۆمارێ ئیرانێ ئیبراهیم رەئیسی د چارچۆڤەیا جڤینا کۆنسەیا هەڤکاریا ئاستا بلندا ئیران – ترکیێ دا سبە رۆژا پێنجشه‌می دچە ئەنقەرەیێ.

بریارە رەئیسی ب سەرۆککۆمارێ ترکیەیێ رەجەپ تاییپ ئەردۆگان رە ژی بجڤە.

8ەمین جڤینا کۆنسەیا هەڤکاریا ئاستا بلندا ئیران – ترکیه‌ سبە ل ئەنقەرەیێ  تێ لدارخستن.

بریارە سەرۆککۆمارێ ئیرانێ ئیبراهیم رەئیسی ژی د جڤینێ دە ئامادە بە.

ل گۆری بەرنامەیا رەئیسی، ئەو دێ ب ئەردۆگان رە ب ئاوایەکی رووبروو بجڤە.

رۆژەڤا سەرەکە یا جڤینێ پێوەندیێن ئابۆری یێن د ناڤبەرا ئەنقەرە و تەهرانێ دە نە.

ل گۆری زانیاریێن کو مەدیایا ترکیێ ژ بەرپرسەکی بلندێ وەزارەتا کارێن دەرڤە یا ترکیێ وەرگرتنە، دێ پێشهاتێن داوی یێن ل غەززە، ئیراق، سووریە، ئەفغانستان و باشوورێ قەفقاسێ ژی د جڤینێ دە بێن گۆتووبێژکرن.

ل گۆری زانیاریان، ئەردۆگان و رەئیسی دێ د جڤینێ دە مژارا سینۆران و پرسێن ئەولەهیێ یێن «ژ بەر په‌كه‌كه‌ و پژاکێ» ژی گۆتووبێژ بکن.