پەیمانگەها رۆژهلاتا ناڤین راگهاند، ئه‌مه‌ریكا سێ گاڤان ژ بۆ کێمکرنا سەردەستیا گرووپێن کو ئیران پشتگریا وان دکە ل ئيراقێ، داڤێژە.
پەیمانگەها رۆژهلاتا ناڤین د راپۆرتەکێ دە گۆت: «بەشەک مەزن ژ ستراتەژیا ئیرانێ ئەوە، هەژموونا خوە یا ئابۆری و لەشکەری ل ئيراقێ خورت بکە، ب تایبەتی ب ڤەکرنا رێیەکە بەژایی بەر ب سووریێ ڤە، ژ بۆ تێکبرنا هەڤالبەندێن ئه‌مه‌ریكا و هەڤکارێن وێیێ ل هەرێمێ».
د راپۆرێ دە بانگ ل ئه‌مه‌ریكایێ هاتیە کرن کو «ب هەر ئاوایی ب رووبروویی هەژموونا ئیرانێ ببە، ئەڤ ژی د دەمەکێ دە کو ئيراق و ئیران تێکلیێن ئابۆرییێن گرینگ هەنە، ژ وان ژی ئيراق دویەمین مەزنترین هاوەردەکارێ کەلووپەلێن ئیرانێ یە و گەلەکی پشتا خوە ب گازا خوەزایی و ئەلەکتریکا ئیرانێ گرێ دایە».
گەلەک ئالیێن سیاسی یێن ئيراقێ پێوەندیێن وان ب ئیرانێ رە هەنە، ب تایبەتی ملیسێن ئيراقی د بن ناڤێ حه‌شدا شه‌عبی دە ژی تێن فینانسەکرن، ژ وان ژی ئاسایب ئەهلولحه‌ق و حزبوللا کو ئێریشێن مەترسیدار ل دژی هێزێن ئه‌مه‌ریكا و هێزێن هەڤپەیمانیا ناڤدەولەتی پێک تینن.
د داویا راپۆرێ دە هاتیە گۆتن: «ئیران ستراتەژیەکە یەکگرتی ل رۆژهلاتا ناڤین دشۆپینە و گرینگە کو ئه‌مه‌ریكا ستراتەژیەکە تایبەت ژ بۆ رووبرووبوونا ڤێ پرسێ ئامادە بکە و ب جهـ بینە».
ئەڤ د دەمەکێ دەیە، ل گەل شەر و پەڤچوونێن د ناڤبەرا ئیسرائیل و حەماسێ دە ل کەرتا غەززەیێ، ئێریشێن گرووپێن چەکدار ل سەر بارەگەهێن ئه‌مه‌ریكایێ ل ئیراق و سووریەیێ زێدە بوونە. د بەرسڤێ دە ژی، ئه‌مه‌ریكا هەژمارە بنکەیێن گرووپێن چەکدار کرنە ئارمانج، د پێشهاتا هەری داوی دە ژی، رۆژا 4ێ چلەیا 2024ان، ئه‌مه‌ریكایێ ناڤەندا لیوایا 12 یا تەڤگەرا ئەل-نوجەبا یا سەر ب حەشدا شه‌عبی ڤە ل بەغدایێ کرە ئارمانج و د ئەنجامێ دە 3 سەرکردەیێن هەشدا شه‌عبی هاتن کوشتن و هەژمارەکە دن ژی بریندار بوون.
