سەرۆکوەزیرێ بەرێ یێ ئیراقێ ئه‌یاد عه‌لاوی رەد دکە کو تشتەک ب ناڤێ ئارتێشێ ل ئیراقێ مابە و گۆت، وەلات ئیراقێ بۆمبەباران دکن و ئارتێشەکە مە یا بهێز نینە کو بەرسڤێ بدە.
د سالڤەگەرا دامەزراندنا ئارتێشا ئیراقێ دە، سەرۆکوەزیرێ بەرێ یێ ئیراقێ ئه‌یاد عه‌لاوی ژ کوردستان 24ێ رە گۆت: «تشتەک ب ناڤێ ئارتێشێ نەمایە، هەموو بوونە گرووپێن چەکدار. وەلاتێن دن راست و چەپ مە بۆمبەباران دکن و پێلاڤێن خوە داتینن سەرێ مە، ژ بەر کو ئارتێشەکە مە یا خورت تونەیە، کەس تونەیە کو بەرسڤا وان بدە».
عه‌لاوی دیار کر: «من ئارتێش ژ نوو ڤە برێک خست و رێزێن وێ کرن یەک. من ئەو هەلوەستێن کو ل دژی کوردان دەرکەتنە رەد کر، نها ژی ئەم وان هەلوەستان رەد دکن و قەبوول ناکن. کورد گەلێ مەیە و نە ژ هەیڤ یان مارسێ هاتنە».
ئاماژە ب وێ ژی کر: «د دەما ئۆپۆزسیۆنێ دە، گەلێ کورد ب جان و ژیانا خوە ئەم پاراستن. کوردستانێ ژ ئالیێ ئه‌مەریکا و سەدام حسێن ڤە هاتبوو دۆرپێچکرن ژی، لێ دیسا ژی کوردان ئەم پاراستن».
ئارتێشا ئیراقێ د 6\1\1921ێ دە د دەما پادشاهیێ دە هات دامەزراندن. د دەستپێکێ دە، ئەو تەنێ ئارتێشەک پیادە بوو، پشتی وێ ژی هێزا ئاسمانی یا ئیراقێ د سالا 1931 دە و هێزێن دەریایی ژی د سالا 1937ان دە هاتن ئاڤاکرن.
ئارتێشا ئیراقێ ژ دامەزراندنا خوە ڤە هەتا نها بەشداری چەندین شەر، ململانەیێن ناڤخوەیی و دەربەیان بوویە، ب تایبەتی شەرێ 8 سالی یێ ئیراق و ئیرانێ، شەرێ داگیرکرنا کویتێ، شەرێ کەنداڤێ، شۆرەشێن کوردی، ئێرشێن کیمیایی ل سەر هەرێما کوردستانێ، ئەنفالکرنا کوردان و سەرکۆتکرنا راپەرینا پارێزگەهێن باشوورێ ئیراقێ د سالا 1991ێ دە.
