ئۆپۆزیسیۆنا ترکیەیێ: ئارمانجا ئۆپەراسیۆنێن ل دژی پەکەکێ نە دیارە

ئۆپەراسیۆنێن ڤێ داویێ یێن ئارتێشا ترکیەیێ ل دژی پەکەکێ، د ناڤخوەیا ترکیەیێ دە راستی رەخنەیان ھات. پارتیێن ئۆپۆزیسیۆنێ حکوومەتێ رەخنە دکن و دبێژن، ئارمانجا ئۆپەراسیۆنان نە دیارە.

جارەکە دن شەر و پەڤچوون د ناڤبەرا ئارتێشا ترکیەیێ و چەکدارێن پەکەکێ ل سەر ناڤچەیێن سینۆری یێن ھەرێما کوردستانێ دە توند بوو و ب دەھان لەشکەرێن ترکیەیێ و چەکدارێن پەکەکێ ھاتن کوشتن.

ھەڤسەرۆکێ پارتیا وەکھەڤیا گەلان و دەمۆکراسیێ (دەم پارتی) تونجەر باکرھان، سەرساخی ژ مالباتێن لەشکەران رە خوەست و ھێڤی کر کو “ئەڤ خوینا کو درژە” بهێت راوەستاندن.

باکرھان گۆت: “شەران ھەر تم ئێش ب خوە رە ئانینە و کورد ژ ھەر کەسی بێھتر ب ئێشا شەری و کوشتنێ دزانن. ھندەک ئالی ژ بەر کو ئێشا شەری فێم ناکن درووشمەیێن شەری بلند دکن.”

ھەڤسەرۆکا دەم پارتیێ تولای ھاتمۆگلو ژی گۆت: “دڤێت شەر راوەستە و کورێن فەقیر ژ بۆ پاراستنا ھێزا ھندەک کەسان نەیێن کوشتن. تاکە چارەسەری ژ بۆ راوەستاندنا شەری، دانوستاندن و لھەڤھاتنەکە سەربلندانەیە.”

ئارتێشا ترکیەیێ ژ رۆژا 18 نیسانا 2022 ڤە ل ناڤچەیێن سینۆری یێن باشوورێ کوردستانێ ل دژی پەکەکێ دەست ب ئۆپەراسیۆنا ب ناڤێ پەنجە-کلیت کریە و ئۆپەراسیۆن ھەتا نھا بەردەوامە.

سەرۆکێ گشتی یێ جەهەپێ ئۆزگور ئۆزەل د جڤینەکا رۆژنامەڤانی دە جارەکە دن رەخنە ل ھەلوەستا حکوومەتێ گرت و گۆت، ئارمانجا ئۆپەراسیۆنا پەنجە-کلیتێ نە دیارە.

ئۆزەل گۆت: “ئەم ژ نھا و پێ ڤە بێدەنگ نامینن، ئەڤ گەل ژی بێدەنگ نامینە. ھەر کو ئەم بێدەنگ بمینن دێ ھەژمارا شەھیدێن مە زێدە ببە. بەرپرسیاریا ھەموو شەھیدێن مە دکەڤە سەر ملێ وان کەسێن کو ھەتا نھا سەدەما دەستپێکرنا ئۆپەراسیۆنا پەنجە-کلیت ئەشکەرە نەکرنە و ئارمانجا وان ژی نایێ زانین؛ ئێدی بەسە.”

ھەر کو بەحسا چارەسەریا پرسگرێکا کورد تێ کرن، یان ژی ھلبژارتن نێزیک دبن، شەر و پەڤچوون د ناڤبەرا ئارتێشا ترکیەیێ و پەکەکێ دژوارتر دبن. بداویبوونا پێڤاژۆیا ئاشتیێ ل ترکیەیێ و دەستپێکرنا ئۆپەراسیۆنێن لەشکەری د سالا 2015 دە، میناکێن بەربچاڤێن ڤێ ھەڤکێشەیێ نە.