سەرۆکوەزیرێ هەرێما کوردستانێ مەسروور بارزانی ژ بۆ بەشداربوونا کۆربەندا ئابۆری یا جیهانی یا داڤۆسێ بەر ب سویسرەیێ ڤە برێ کەت.
سەرۆکوەزیر مەسروور بارزانی د چارچۆڤەیا بەشداریا د کۆربەندا ئابۆری یا جیهانی یا داڤۆسێ دە، دێ ل گەل هەژمارەک ژ سەرۆکوەزیر و بەرپرسێن پایەبلندێن رۆژهلاتا ناڤین، ئەورۆپا و جیهانێ بجڤە. د هەڤدیتنێن خوە دە، دێ چەندین مژارێن ناڤخوەیی، ناڤچەیی و جیهانی ژ وان ژی پێشخستنا پێوەندیێن دوئالی ب تایبەتی د وارێن ئابۆری و وەبەرهێنانێ دە گۆتووبێژ بکن.
هەروها بریارە ژی سەرۆکوەزیر مەسروور بارزانی بەشداری پانەلەکە ل سەر ناکۆکیێن ل رۆژهلاتا ناڤین ببە.
بەشداربوونا سەرۆکوەزیر د کۆنفەرانسا داڤۆسێ دە، د چارچۆڤەیا هەولێن بەردەوامێن هەرێما کوردستانێ دە یە، ژ بۆ بهێزکرنا پێوەندیێن ل گەل وەلاتان و گۆتووبێژکرنا پرسێن کو گرێدایی پاشەرۆژا ئیراق و ناڤچەیێ ب گشتینە.
شاندا حکوومەتا هەرێما کوردستانێ ژ هەژمارەک بەرپرسێن حکوومەتا کوردستانێ، سەرمایەدار و کارسازێن کوردستانێ پێک تێ کو بۆ جارا یەکێ یە بەشداری داڤۆسێ دبن. مالا کوردی ژی ب دەستپێشخەری و پێشنیارا سەرۆکوەزیر مەسروور بارزانی ل داڤۆسێ تێ ڤەکرن.
کۆنفەرانسا ئیسال ب ناڤێ «ئاڤاکرنا باوەریێ» تێ لدارخستن و تێ دە چەندین بابەتێن گرێدایی ب ئەنەرژی، سیستەما بانکی، زیرەکیا دەستکرد و چەندین مژارێن سیاسییێن ئاکتوئەل تێن گۆتووبێژکرن.
