وەزارەتا کارێن دەرڤە یا ئیرانێ، ل سەر ئێرشێن سوپایا پاسدارانا ئیرانێ داخویانیەک بەلاڤ کر و تێ ده گۆت كو وان «ژ بۆ پاراستنا ئەولەهیا وەلاتێ خوە» ئەڤ ئێرش کریە!.
وەزارەتا کارێن دەرڤە یا ئیرانێ ئیدا کر کو وان «ژ بۆ پاراستنا ئەولەهیا وەلاتێ خوە» ئەڤ ئێرش کریە و گۆت: «پێنگاڤێن لەشکەری یێن ئیرانێ یێن ل دژی تەرۆریستان، پاراستنەکە بهێزا ئەولەهیا وەلاتێ مە بوون».
بەردەڤکێ وەزارەتا کارێن دەرڤە یا ئیرانێ ناسر كه‌نعانی ئیرۆ داخویانیەک بەلاڤ کر.
كه‌نعانی د داخویانیا خوە دە ئیدا کر کو «ئەو ئێرش بەشەکن ژ جەزایێن عادل یێن ئیرانێ یێن ل هەمبەری بنپێکرنا ئەولەهیا وەلات» و بەردەوام کر: «ئیران تم و دائیم پشتگریێ ددە ئاشتی، ئەولەهی و ئارامیا هەرێمێ و رێزێ ل سەروەریا هەموو وەلاتان دگرە لێ ژ بۆ بەرسڤدایینا چاڤکانیێن گەفێن ل سەر ئەولەهیا وەلات، پاراستنا وەلاتیێن خوە و جەزاکرنا تاوانباران دودلیێ ناکە».
بەردەڤکێ وەزارەتا کارێن دەرڤە یا ئیرانێ ناسر كه‌نعانی د بەردەوامیا داخویانیا خوە دە وها گۆت: دژمن ب شیرۆڤەکرنەکە خەلەت مەیلا خوە دایە تاوانێن ل هەمبەری گەلێ ئیرانێ و کۆمارا ئیسلامی یا ئیرانێ.
کۆمارا ئیسلامی ژی ب شیانا خوە یا زێدە د ئۆپەراسیۆنەکە هوور و ب ئارمانج دە بارەگەهێن تاوانکاران دەستنیشان کرنە و ئەڤ بارەگەهـ ب مووشەکێن دوورهێڤێژ کرنە هەدەف.
ئەڤ پێنگاڤ بەشەکن ژ بەرسڤێن کۆمارا ئیسلامی یێن ل هەمبەری وان کەسێن کو ل دژی ئەولەهیا وەلات و وەلاتیێن وێ گاڤان داڤێژن.
