هەر یەک ژ وەزارەتا کارێن دەرڤە یا ئامەریکایێ و وەزارەتا کارێن دەرڤە یا ئالمانیایێ ئێرشێن ئیرانێ یێن ل ھەولێرێ ب توندی شەرمەزار کرن و ژ مالباتێن قوربانیان رە سەرساخی خوەستن.
شەڤا بۆری سوپایێ پاسدارێن ئیرانێ دەردۆرا دەمژمێر 23:30 ب دەھ مووشەکان ئێرشی 8 جھێن ھەولێرێ کر و پێنج ژ ڤان مووشەکان ل مالا کارسازێ کورد پێشرەو دزەیی کەتن.
د ڤێ ئێرشا ئیرانێ دە پێشرەو دزەیی، کەرەم میکایلێ کو کارسازەکی ئیراقی یێ کریستیانە و دەما ئێرشێ مێڤانێ پێشرەو دزەیی بوویە و کەچا پێشرەو دزەیی یا یەک سالی یا ب ناڤێ ژینە جانێ خوە ژ دەست دان.
پشتی ڤێ ئێریشا ئیرانێ، هەژمارەک هەری زێدە یا ولاتێن جیهانێ ئەڤ ئێریش شەرمەزار کرن، ژ ڤان ولاتان ژی هەر یەک ژ ئامەریکا و ئالمانیایێ ب داخویانیێن جودا ئەڤ ئێریش شەرمەزار کرن.
وەزارەتا کارێن دەرڤەیا ئامەریکایێ ئێرشێن ئیرانێ یێن ل ھەولێرێ ب توندی شەرمەزار کرن و ژ مالباتێن قوربانیان رە سەرساخی خوەست.
وەزارەتێ گۆت “ئەم ل دژی ئێرشێن مووشەکی یێن بێپەروایێن ئیرانێ نە کو ئارامیا ئیراقێ تێک ددن.”
هەر وەها ژ ئالیێ خوە ڤە وەزارەتا کارێن دەرڤە یا ئالمانیایێ ژی ئەڤ ئێریشا ئیرانێ یا ل سەر هەولێرا پایتەختا هەرێما کوردستانێ شەرمەزار کر و راگهاند، “ئەم ئێرشا مووشەکی یا ئیشەڤ یا ئیرانێ یا نەبەرپرسانە ل ھەولێرێ ب توندی شەرمەزار دکن. ئەو یەکپارچەییا ئاخا ئیراقێ بنپێ دکە و ئارامیا تەڤاھیا ھەرێمێ دخە مەترسیێ. دلێ مە ب مالباتێن قوربانیان رەیە.”
