وەزارەتا دەرڤە یا ئیراقێ ل مالپەرا خوە یا فەرمی بەلاڤ کر، وان گلینامەیەک دەربارێ ئێرشێن دژمنانە و مووشەکی یێن ئیرانێ ل سەر هەولێرێ دە، پێشکێشی ئەنجوومەنا ئاسایشا ناڤدەولەتی و نەتەوەیێن یەکگرتی کر و راگهاند، د ئێریشان دە سڤیل هاتن کوشتن و بریندارکرن و زیان گهشتیە مال و ملکێن گشتی و تایبەت.
د داخویانیا وەزارەتا دەرڤە یا ئیراقێ دە هاتیە، وان ب رێیا نوونەرتیا ئیراقێ ل نیۆیۆركێ، دو نامەیێن وەک هەڤ ژ سەکرەتەرێ گشتی یێ نه‌ته‌وێن یه‌كبوویی و سەرۆکێ ئەنجوومەنا ئاسایشا ناڤدەولەتی رە شاندن و تێ دە تەکەز کرنە کو ئەو کریارا دژمنانە یا ئیرانێ، بنپێکرنا ئاشکەرە یا سەروەری و ئەولەهیا ئیراق، هەرێما کوردستانێ و وەلاتیێن ئیراقێ یە.
شەڤا 15\01\2024 چەند دەڤەرێن سڤیلان ل هەولێر و دەردۆرا وێ ب چەند مووشەکێن بالیستی و درۆنان هاتن ئارمانجکرن. پشترە ژی پاسدارێن شۆرەشا ئیرانێ بەرپرسیاریا ئێریشان گرت سەر خوە.
د ئەنجاما ئێریشێ دە، 5 وەلاتی شەهید بوون و 6 وەلاتیێن دن ژی بریندار بوون کو پرانیا وان ئەندامێن مالباتا پێشرەو دزەیی بوون.
پشتی سەردانا جهێ ئێریش و برینداران، شێورمەندێ ئاسایشا نشتمانی یا ئیراقێ قاسم ئەل-ئه‌عره‌جی کو سەرۆکێ کۆمیتەیا لێکۆلینێ یا حكوومه‌تا ئیراقێ یە راگهاند: «ب ئاوایەکی مەیدانی مە ل گەل کۆمیتەیا لێکۆلینێ سەردانا مالا سەرمایەدارەکی ل هەولێرێ کر، هاتبوو بۆمبەبارانکرن. دەرکەت هۆلێ کو گۆتەگۆتێن دبێژن کو بارەگەها مۆسادێ ل هەولێرێ هاتیە ئارمانجکرن، ژ راستیێ دوورن».
