وەزیرێ دەرڤە یێ رووسیا سێرگەی لاڤرۆڤ دبێژیت، کوردێن سووریێ یێن کو خوە ل ئه‌مه‌ریكایێ دگرن، پشتا خوە ب «شەرتانەکا سەختە» ڤە گرێ دده‌ن.
ئەڤ داخویانیا لاڤرۆڤ پشتی وێ یەکێ هات کو رۆژنامەیا ئه‌مه‌ریكی «فۆریگن پۆلیسی» راگه‌هاندبوو، ئۆپەراسیۆنا «تۆفانا ئەل-ئەقسا» ل غەززە و کارڤەدانێن وێ ل سەر ده‌ڤه‌رێ، وه‌كر کو رێڤەبه‌ریا سەرۆکێ ئه‌مه‌ریكا جۆ بایدن هزرا ڤەکێشانا هێزێن وەلاتێ خوە ژ سووریێ بکەت.
لاڤرۆڤ د کۆنفرانسەکێ رۆژنامەڤانی دە پشتی بەشداربوونا وی د چالاکیێن ئەنجوومەنا ئاسایشا ناڤدەولەتی دا، ل سەر وێ پرسێ گۆت: «ئەڤه جارەکێ هاتبوو کرن، دەما کو سەرۆکێ بەرێ یێ ئه‌مه‌ریكا دۆنالد ترامپ (ل داویا سالا 2019) نیازا خوە ب هەمان رەنگی راگه‌هاندبوو».
هەروها گۆت ژی: «د وی دەمی دا هێزێن سووریا دەمۆکراتیک (هه‌سه‌ده) یەکسەر داخواز ژ رووسیا و هێزێن وێ یێن لەشکەری کر کو هاریكاریا وێ بکن دا کو په‌یوه‌ندییان ل گه‌ل شامێ بکه‌ن».
لاڤرۆڤ دەستنیشان کر: «پشتی چەند رۆژان، ئه‌مه‌ریكا بریارا خوە گوهارت و هه‌سه‌دێ دەست ژ داخوازا چێكرنا په‌یوه‌ندییان ل گه‌ل شامێ بەردا و یەکسەر ڤەگەریان بن باسکێ ئه‌مه‌ریكا».
وەزیرێ دەرڤە یێ رووسیا دیار کر: «ل ڤێرێ پرس نە ئەوە کو هێزێن ئه‌مه‌ریكی دێ هێن ڤه‌كێشان یان نه، پرس ئەوە کو ئەو ب ئاوایەکی نەقانوونی ل وێرێ نه و ئەو هێزێن سیاسی یێن د ناڤ کوردێن سووریێ دا یێن خوە دسپێرن سیوانا ئه‌مه‌ریكا و خوە ب ئه‌مه‌ریكا ڤە گرێ دده‌ن، ژ ئالیێ ئەخلاقی و سیاسی ڤە، ئه‌و خوە ب شەرتانەکا ساختە ڤە گرێ دده‌ن».
