وەزارەتا بەرەڤانیێ یا ئامەریکایێ (پێنتاگۆن) راگهاند، وان دەست ب کێمکرنا هەژمارا لەشکەرێن خوەیێن ل ئیراقێ کریە و ئەڤ پێنگاڤ وەکە “سەرکەفتنەکە هەڤپار” د شەرێ ل دژی داعشێ دە بناڤ کر.
پێنتاگۆنێ هەژمارا لەشکەرێن کو دێ بێن ڤەکشاندن و یێن کو دێ ل ئیراقێ بمینن، ئەشکەرە نەکر.
بەردەڤکێ پێنتاگۆنێ سیان پارنەل دەربارێ مژارێ دە گۆت: “ل گۆری رێنماییێن سەرۆکێ ئامەریکایێ و ب هەماهەنگیا کارێن کۆمیسیۆنا بلندا لەشکەری یا ئامەریکا-ئیراقێ، داخویانیەکە هەڤپار د 27ێ ئیلۆنا 2024ان دە هاتبوو بەلاڤکرن کو ئامەریکا و هەڤپەیمانێن وێ دێ ئەرکێن خوەیێن لەشکەری ل ئیراقێ کێم بکن.”
پارنەل هەروها ئاماژە ب وێ یەکێ کر، ئەڤ کێمکرن نیشانا سەرکەفتنا هەڤپارا ل دژی داعشێیە و گۆت: “ئەڤ د هەمان دەمێ دە پێنگاڤەکە بەر ب هەڤکاریەکە ئەولەهیێ یا بەردەوام د ناڤبەرا ئامەریکا و ئیراقێ دە، کو ل گۆری بەرژەوەندیێن ئامەریکایێ، دەستوورا ئیراقێ و رێکەفتنا چارچۆڤەیا ستراتەژیکا ئامەریکا-ئیراقێیە.”
بەردەڤکێ پێنتاگۆنێ د داویێ دە تەکەز کر، ئەڤ هەڤکاری دێ پشتگریێ بدە ئەولەهیا هەر دو وەلاتان و شیانا ئیراقێ یا ژ بۆ پێشخستنا ئابۆریێ، کشاندنا سەرمایەداریا بیانی و وەرگرتنا رۆلەکە سەرەکی ل هەرێمێ بلند بکە.
پارنەڵ گۆت: “حکوومەتا ئامەریکایێ دێ ژ بۆ مسۆگەرکرنا ڤەگوهاستنەکە ب رێک و پێک، هەڤاهەنگیا خوە ب حکوومەتا ئیراقێ و هەڤپەیمانان رە بدۆمینە.”
