بەرپرسێ په‌كه‌كێ یێ هامبورگێ هات دەستەسەرکرن
ل ئالمانیایێ د ئۆپەراسیۆنەکە پۆلیسان دە “بەرپرسێ په‌كه‌كێ یێ هامبورگێ” هات دەستەسەر کرن.
وەلاتیێ ژ باکورێ کوردستانێیێ 54 سالی کو ناڤێ وی نەهاتیە ئەشکەرەکرن، ب “پرۆپاگاندا و کۆمکرنا ئالیکاریێ یا ل سەر ناڤێ رێخستنێ” تێ تۆمەتبارکرن.
پۆلیسێن ساکسۆنیایێ راگهاندنە کو «وەلاتیێ ترکیەیێ یێ 54 سالی ب بریارا دادگەها ئەیالەتا درەسدەنێ هاتیە دەستەسەرکرن».
هات ئەشکەرەکرن کو ل مالا وی یا ل باژارێ کۆلنێ گەریانە و «ئۆپەراسیۆن ب ئاوایەکی هەڤپار ژ ئالیێ پۆلیسێن هامبورگ، ساکسۆنیایا ژێرین و رەن-وەستفالیایا باکور ڤە» هاتیە کرن.
کەسێ کو ب “جهگرتنا د ناڤ په‌كه‌كێ دە و ئەندامتیا رێخستنا تەرۆرێ” تێ تۆمەتبارکرن، تێ گۆتن کو د ناڤبەرا سالێن 2015-2018ان دە بەرپرسێ هەرێما ساکسۆنیایێ بوویە.
د داخویانیا پۆلیسێ ساکسۆنیایێ هاتیه: “د ناڤ ئەرکێن گومانبار دە، چاڤدێری و برێڤەبریا بەرپرسێن هەرێمی یێن په‌كه‌كێ یێن گرێدایی وی، هەر وها ئۆرگانیزەکرنا چالاکیێن پرۆپاگاندایێ و جڤینان جهـ دگرن. وی ژ بۆ په‌كه‌كێ کامپانیایێن سالانە یێن بەخشینێ ژی ئۆرگانیزە کرنە.”
تێ پایین کو کەسێ دەستەسەرکری دەرخن پێشبەری دادوەرێ لێپرسینێ یێ دادگەها ئەیالەتا درەسدەنێ.
پۆلیسێ ساکسۆنیایێ هەر وها راگهاند کو ل مالێن دو وەلاتیێن دن یێن 46 و 53 سالی کو ئەو ژی ب ئەندامه‌تی و پشتگریا په‌كه‌كێ تێن تۆمەتبارکرن، لێگەرین هاتیە کرن.
هات دیارکرن کو د ڤان لێگەرینان دە دەست دانینە سەر تەلەفۆن، جیهازێن دەپۆکرنا ئاماران، بەلگە و كۆژمه‌ه‌كی مەزن یێ پەرەیان.
