گرۆپێن چەکداران ب درۆنان ئێریشی بارەگەھێن ئامەریکا ل ئیراق و سووریەیێ کرن و ل گۆری پەنتاگۆنێ، ھەژمارەک لەشکەرێن ئامەریکی بریندار بوونە.
ئاژانسا “رویتەرس” ل سەر زارێ بەرپرسێن پایەبلندێن وەزارەتا بەرەڤانیێ یا ئامەریکایێ (پەنتاگۆن) راگھاند، د 24 دەمژمێرێن بۆری دە، گرۆپێن ملیسان یێن ئیراقی یێن ئیران پشتەڤانیا وان دکە، ب درۆنان ئێرشی بارەگەھێن عەین ئەسەد ل رۆژئاڤایێ پارێزگەھا ئەنبارێ، کێلگەھا کۆنیکۆ و گوندێ ئەل-خەدرا ل پارێزگەھا دێرازۆرێ یا سووریەیێ کرن.
ل گۆری بەرپرسێن پەنتاگۆنێ، د ئێریشان دە ھەژمارەک ژ کارمەندێن ئامەریکی د وان ئێریشان دە ب سڤکی بریندار بوونە.
ژ ئالیێ خوە ڤە، گرۆپا ب ناڤێ “بەرخوەدانا ئیسلامی ل ئیراقێ” راگھاند، وان دوھی ئەینیێ بارەگەھا عەین ئەل-ئەسەد ل ئەنبارێ و ئیرۆ شەمیێ دانێ بارەگەھێن ئامەریکایێ ل کێلگەھا کۆنیکۆ و گوندێ ئەل-خەدرا ل پارێزگەھا دێرازۆرێ ب دۆرنان کرنە ئارمانج.
د دەما بۆری دە و پشتی شەرێ د ناڤبەرا ئیسرایل و حەماسێ دە، ئێریشێن ل سەر بارەگەھێن لەشکەری یێن ئامەریکایێ ل سووریێ و ئیراقێ زێدە بوونە. د بەرسڤێ دە ژی، ئامەریکا ژی چەند جاران بارەگەھێن گرۆپێن چەکداران ل ئیراقێ کرنە ئارمانج.
بەرپرسێن پەنتاگۆنێ پێشتر راگھاندبوون، د ناڤبەرا جۆتمەھا 2023 و 20 چلەیا 2024 دە، نێزیکی 70 لەشکەر د ئێریشێن درۆن و مووشەکان دە بریندار بوونە. لێ پرانیا وان پشتی وەرگرتنا دەرمانکرنێ ڤەگەریانە سەر کارێن خوە، ژ بلی ھەژمارەکا کێم ژی ھین د بن چاڤدێریا بژیشکی دە نە.
