ھێزێن ئامەریکایێ ژ ئیراقێ ڤەدکشێن

 گۆتووبێژێن دوئالی یێن د ناڤبەرا ئیراق و ئامەریکایێ دە ژ بۆ داوی ئانینا ئەرکێ ھێزێن ھەڤپەیمانا ناڤنەتەوی دەستپێ کر.

ئیرۆ 27/1/2024 ئۆفیسا راگەھاندنا سەرۆکوەزیرێ ئیراقێ ب بەیانامەیەکی راگەھاند: “سەرۆکوەزیرێ ئیراقێ محەمەد شیاع سوودانی سەرپەرەشتیا دەستپێکرنا یەکەم گۆتووبێژا دوئالی یا د ناڤبەرا ئیراق و ئامەریکایێ دە کر، ژ بۆ داوی ئانینا ب ئەرکێ ھێزێن ھەڤپەیمانیا ناڤنەتەوی ل ئیراقێ.

بەری نھا ژی وەزارەتا دەرڤە یا ئیراقێ پێشڤەچوونا دانووستانێن د ناڤبەرا حکوومەتا ئیراق و ئامەریکایێ راگەھاند، کو مەھا تەباخا 2023 دە دەستپێ کر، ژ بۆ دارژاندنا لیستەیەکا دەمی بۆ ڤەکێشاندنا ھێزێن ھەڤپەیمانیا ناڤنەتەوی ل ئیراقێ.

دەربارێ داخویانیا وەزارەتا دەرڤەیا ئیراقێ وەزیرێ بەرەڤانیا ئامەریکایێ لۆید ئوستن د داخویانیەکی دە راگەھاند: “لژنەیا بلندا لەشکەری ھەول ددە ئامەریکا و ئیراق گاڤان باڤێژن بۆ پەیوەندیەکا ئەولەھیێ یا بەردەوام د ناڤبەرا خوە دە.”