دامەزراندنا پارتیا ب ناڤێ داڤا (دۆز) ل ئەلمانیایێ بوو سەدەما نیقاشان. ھەر چقاسی سەرۆکێ پارتیا داڤا دبێژە ئەم نە گرێدایی چ ھێز و پارتیانە ژی، لێ بەلێ گەلەک ژ دامەزرێنەرێن پارتیێ ژ پێڤاژۆیا ئاکەپێ-مەھەپێ و ئیسلامیستێن ترک پێک تێن.
پارتیا تفاقا دەمۆکراتیکا پڕ رەنگی و شیاربوونێ DAVA ، کو ژ ئالیێ کۆچبەرێن ب ئەسلێ خوە ترکن ھاتیە دامەزراندن، ل ئەلمانیایێ بوو سەدەما نیقاشان.
رۆژنامەگەر و سیاسەتمەدارێن ئیدیعا دکن کو پارتیا داڤا “بەرفرەھیا ئاک پارتیێ یە” رەخنە لێ گرتن. رۆژنامەیا ھەری مەزنا وەلات بلد، پارتیا داڤا ب سەرناڤێ “پارتیا ئەردۆگان” نرخاند و گەلەک رۆژنامەیان ژی ھەمان پێناسە ب کار ئانین.
ھات دیارکرن کو دێ پارتیا داڤا د خزیرانا بهێت دە بەشداری ھلبژارتنێن پارلامەنتۆیا ئەورۆپایێ ببە و شانسێ وێ یێ بدەستخستنا کورسیان ژی ھەیە. پارتیا داڤا ب داخویانیەک نڤیسکی ئیدیعایێن کو دبێژن داڤا گرێدایی ئاک پارتیێ یە رەد کر.
د ناڤ دامەزرێنەرێن پارتیێ دە کەسێن کو د یەکتیا کارێن دیانەتێ یا ترک-ئیسلامێ و رێخستنا ئاک پارتیێ یا ئەورۆپایێ یا یەکیتیا دەمۆکراتێن ناڤنەتەوەیی دە دخەبتن ھەنە.
ھەڤسەرۆکا گشتی یا پارتیا سۆسیال دەمۆکرات ساسکا ئیسکین ژ تەلەڤیزیۆنا Welt رە ئاخڤی و گۆت: “دڤێت ئەم نە دەستوورێ بدن راستگرێن توندێن دخوازن کۆچبەران دەرسینۆر بکن و نە ژی مەیلێن جوداخوازێن رەجەب تەییب ئەردۆگان. دڤێت ئەم ب ئاوایەکی ئەشکەرە ژ وەلاتیێن خوە یێن ب ئەسلێ خوە ترک رە ببێژن کو ل ئەلمانیایێ جوداکاری تونەیە و ئەم ھەموو یەک گەلن”.
ئالیکارێ سەرۆکێ کۆما بوندەستاگێ یا پارتیا یەکیتیا دەمۆکراتا کرستیان جێنس سپاھن، د پلاتفۆرما X “تویتەرا بەرێ” دە پارتیا داڤا وەک “پارتیەک توندرەو” ب ناڤ کر. سپاھن ئیدیعا کر کو ئاڤاکرنا پارتیێ ژ بەر کو حکوومەتا کۆالیسیۆنێ یا ژ SPD، کەسکان و پارتیا دەمۆکراتیکا ئازاد (FDP) پێک تێ، ژ بەر سەدەما قەبوولکرنا “دو ھەموەلاتیبوونێ” پێک ھاتیە.
بەردەڤکێ پۆلیتیکایا ناڤخوەیی یا CDO کریستۆف دە ڤرێس ژ حکوومەتا فەدەرال خوەست کو پارتیا داڤا بچووک نەبینە. دە ڤرێس گۆت: “پێویستە یەکینەیێن ئەولەکاریێ چاڤدێریا چالاکیێن پارتیێ و پەیوەندیێن وێ ب حکوومەتا ترکیێ ڤە بکن، ئەگەر هەبن”.
