فەرمانداریا ناڤەندی یا ئامەریکایێ (سێنتکۆم) راگھاند، وان ل ئیراق و سووریێ ل 85 ئارمانجێن فەیلەقا قودس یا سەر ب سوپایا پاسدارێن ئیرانێ ڤە دانە.
سێنتکۆم د داخویانیا خوە دە گۆت: “ھێزێن مە ل ئیراق و سووریێ ل دژی فەیلەقا قودس یا سەر ب سوپایا پاسدارێن ئیرانێ و کۆمێن گرێدایی وێ ئێریشێن ئاسمانی پێک ئانینە و ل زێدەتری 85 ئارمانجان خستنە.”
سێنتکۆم دیار کر ژی، د ئێریشان دە بارەگەھ، جەبلخانە، ناڤەندێن ئیستخباراتان، کۆمگەھێن درۆنانێن کو ل دژی ھێزێن ئامەریکا و ھەڤپەیمانان تێن بکارئانین و بنکەیێن لۆجستیک ھاتن بۆمبەکرن.
د ڤێ دەربارێ دە کەنالا “فۆکس نیوس” ژ ژێدەرێن لەشکەری یێن ئامەریکی بەلاڤ کر، ئەڤ ئێریش وەک بەرسڤەکێ ل سەر کوشتنا 3 لەشکەرێن ئامەریکی ل ئوردنێ بوو و ئێریشێن ل دژی گرۆپێن چەکداران دەستپێ کر.
ژ ئالیێ خوە ڤە مەدیایا ئیرانێ راگھاند، د ئەنجاما ئێریشان دە 10 کەس ھاتنە کوشتن. مەدیایا سووریەیێ ژی راگھاند، د ناڤ کوشتیان دە 3 ئیراقی ھەنە.
رەوانگەھا سووری یا مافێن مرۆڤ (SOHR) راگھاند، چەند چەپەر ل دەڤەرێن حەیدەریە و شبلی ل دێرزۆرێ و دەڤەرێن د ناڤبەرا بوکەمال و مەیادین ل رۆژھلاتێ سووریێ ھاتنە بۆمبەبارانکرن.
فەرماندارێ سێنتکۆمێ مایکل ئێریک کۆرێلا ژی ل تۆرا “X” بەلاڤ کر، سوپایا قودسا پاسدارێن ئیرانێ و ملیسێن سەر ب وێ ڤە مەترسیەک راستەراست ل سەر ئارامیا ئیراق و ناڤچەیێ و ژیانا ئامەریکییانن.
کۆرێلا گۆت: “ئەم دێ ھەموو تەدبیران بگرن ژ بۆ پاراستنا گەلێ خوە و سزادانا ھەموو کەسێن کو ل سەر ژیانا وەلاتیێن مە دبن مەترسی.”
ھەر د ڤێ ناڤبەرێ دە، کۆشکا سپی گۆت، ئامەریکا بەری کو ئێریشێن تۆلھلدانێ پێک بینە، حکوومەتا ئیراقی ئاگاھدار کریە، لێ بەغدایێ ئەو ئێریشێن ئاسمانی وەک “بنپێکرنا” سەروەرییا خوە شەرمەزار کر.
