بەردەڤکێ حکوومەتا ئیراقێ راگھاند، د ئێریشێن ئاسمانی یێن ئامەریکایێ ل پارێزگەھا ئەنبارێ دە، ھەری کێم 16 کەس ھاتنە کوشتن و 25 کەسێن دن ژی بریندار بوونە.
بەردەڤکێ حکوومەتا ئیراقێ، باسم ئەل-عەوادی، ئیرۆ 3 شباتا 2024 د داخویانیەکێ دە راگھاند، رێڤەبەریا ئامەریکایێ دەستدرێژیەکە نوو ل سەر سەروەریا ئیراقێ کر و جھێن ھێزێن مەیێن ئەولەھیێ ل عەکاشات و ئەل-قائم ژ ئالیێ فرۆکەیان بۆمبەباران کرن.
ئەل-عەوادی ئاشکەرە کر، د ئەنجاما بۆمبەبارانا ئامەریکایێ دە، 16 چەکدار ھاتن کوشتن و 25 چەکدارێن دن ژی بریندار بوون، ھەروھا زیان گھیشت ئاڤاھی و ملکێن وەلاتیان.
ھەر چەند بەرپرسێن ئامەریکی گۆتن کو وان حکوومەتا ئیراقێ ژ ئێریشان ئاگاھدار کرنە، لێ بەردەڤکێ حکوومەتا ئیراقێ ئەو گۆتەگۆت رەد کرن و گۆت کو داخویانیێن بەرپرسێن ئامەریکی ب مەبەستا “خاپاندنا رایا گشتی یا ناڤدەولەتی و رەدکرنا بەرپرسیاریا قانوونی یا ڤێ تاوانێ”یە.
عەوادی گۆت کو ئێریشێن ئامەریکایێ رەوشا ئەولەکارییا ل ئیراقێ تێک ددە. ھەروھا گۆت: “ئیراق رەد دکە کو خاکا وێ وەکی قادەکێ ژ بۆ چارەسەرکرنا ناکۆکیێن ناڤدەولەتی و نیشاندانا ھێزا وەلاتێن دژبەر بێ بکارئانین.”
ل ھەمبەر کوشتنا 3 لەشکەرێن ئامەریکی ل بارەگەھا ت-22 ل سەر سینۆرێ ئوردنێ، ئامەریکا ئێریش بر سەر گرۆپ و بنگەھێن ملیسێن ل ئیراق و سووریەیێ و ل گۆری فەرمانداریا ناڤەندی یا ئامەریکایێ (سێنتکۆم)، ل ئیراق و سووریەیێ ل 85 ئارمانجێن فەیلەقا قودسا سەر ب سوپایا پاسدارێن ئیرانێ ڤە ھاتن وێرانکرن.
