ئامەریکا و بریتانیا ئێریشێن ھەڤپار ل دژی حووسیێن یەمەنێ ئەنجام دان

ئامەریکا و بریتانیایێ ب داخویانیەکا ھەڤپار راگھاندن، وان ل یەمەنێ 36 ئارمانجێن حووسیان بۆمبەباران کرنە.

ل گۆری داخویانیێ، ئەڤ ئێریش وەکە بەرسڤەکێ ل سەر بەردەوامیا ئێریشێن حووسیان ل سەر کەشتیێن بازرگانی یێن د دەریایا سۆر رە دەرباس دبن. تەکەز کر ژی، ئەڤ ئێریش ب ئارمانجا کێمکرنا گرژی و ڤەگەراندنا ئارامیێ ل دەریایا سۆرە.

دیار کر ژی، گەرەکە دن یا ئێریشان ژی ب پشتگرییا ئووسترالیا، بەحرەین، کانادا، دانیمارک، ھۆلاندا و نیوزلەندێ پێک ھات و 13 جھێن گرۆپا چەکدار ھاتن ئارمانجکرن.

داخویانیێ ھشیاری دا سەرکردەیێن حووسی کو واشنگتۆن و لەندەن ” دودل نابن ژ بۆ پاراستنا ئەولەھیێ و دەرباسبوونا ئازادا بازرگانیێ ل یەک ژ گرینگترین رێیێن ئاڤێ ل جیھانێ.”

داخویانیا ھەڤپارا ئامەریکا و بریتانیایێ دیار کر ژی، ئێریشان مەخزەنێن چەکان، سیستەمێن مووشەکان، سەکۆیێن ئاڤێتنا مووشەکان و رادارێن حووسیان کرن ئارمانج.

ژ ئالیێ خوە ڤە وەزیرێ بەرەڤانیا ئامەریکا لۆید ئاوستن گۆت، ئێریشێن وان پەیامەک ژ بۆی حووسیان بوو کو ئەگەر ئێریشێن خوە ل سەر کەشتی و گەمیێن ناڤدەولەتی نەراوەستینن، دێ راستی ئەنجامێن زێدەتر بێن.

حووسیان پشتی شەرێ ل غەززەیێ ژ 19 جۆتمەھا 2023 دگۆتن، ئەو کەشتیێن گرێدایی ئیسرایلێ دچن ور دکن ئارمانج، لێ پشتی ئێریشێن ئامەریکا و بریتانیا یێن د 12 و 22 چلەیا بۆری دە، ئێدی حووسی ب پرانی کەشتیێن گرێدایی ئامەریکا و بریتانیایێ دکن ئارمانج.

ئەڤ ئێریشێن ل یەمەنێ، ھەڤدەمن لگەل ئێریشێن ئاسمانی یێن ئامەریکا ل ئیراق و سووریەیێ کو تێ دە ھێزێن ئیرانی و کۆمێن سەر ب تەھرانێ کربوون ئارمانج و دۆرا 35 چەکداران ھاتبوون کوشتن.