پارتیا وەلاتپارێزێن کوردستانێ بانگ ل مالباتێن کورد کر زارۆکێن خوە د وانەیا بژارتە دە تۆمار بکن

پارتیا وەلاتپارێزێن کوردستانێ (PWK)ێ ب داخویانیەکا نڤیسکی بانگ ل مالباتێن کورد کر کو زارۆکێن خوە ل دبستانان ژ بۆ دەرس ئانگۆ وانەیا کوردی تۆمار بکن.

داخویانیا پارتیا وەلاتپارێزێن کوردستانێ واھایە:

ئەم بانگی مالباتێن کوردان دکن کو زارۆکێن خوە د دەرسا بژارتەیا کوردی دە تۆمار بکن!

مافێ پەروەردەیا ب زمانێ کوردی (کورمانجی و کردکی/زازاکی) مافەکی بنگەھین، رەوا  و مەشرووع یێ ملەتێ کوردە. دەولەتا ترکییێ ئەڤ 100 سالن کو مافێ پەروەردەیا ب زمانێ کوردی قەبوول نەکرییە و زمانێ کوردی وەکە زمانەکی فەرمی نەھاتییە قەبوول کرن. کوردی د یاسایا بنگەھین و د ھەموو یاسایێن دەولەتا ترکییێ دە ھینا ژی قەدەغەیە.

لێ بەلێ، ھەرچقاس  ھەموو پێویستییێن وێ  ژ ئالییێ دەولەتا ترکییێ ڤە نایێن بجیھ ئانین ژی، ئەڤە 12 سالن کو ل باکورێ کوردستانێ و ل ترکییێ د پەروەردەھیێ دە دەرسێن کوردی وەکە دەرسێن بژارتە ھاتییە دانین.

ل باکورێ کوردستانێ و ترکیێ دەرسا بژارتە، ئانگۆ دەرسا زمانێ کوردی د ھەموو دبستانان دە ژ بۆ خوەندەکارێن پۆلا 5،6،7 و 8ێ مافەکە و نھا دەما سەرلێدانا ڤی مافی، ل دبستانان دەستپێ کریە و دێ ھەتا 12 شباتا  2024 بەردەوام بکە. خوەندەکار دڤێت ھەتا 12 شباتا  2024 دەرسێن خوە ببژێرن و رێڤەبەرییا دبستانا خوە د ڤێ دەربارێ دە ئاگاھدار بکن. 

دڤێت ھەموو مالباتێن کوردان گرینگییێ بدن ھلبژارتنا دەرسا کوردی. بکارئانینا ڤی مافی وەکە وازیفەیەکا نەتەوییە ژی ل سەر ملێن ھەموو مالباتێن کوردان.

زارۆکێن کوردان پێشەرۆژا ملەتێ کوردن. ھەر کێس و فرسەندەکا کو ژ بۆ فێربوونا زمانێ کوردی، فرسەندا ھووناندنا پێشەرۆژا ملەتێ کوردە.

ئەم وەکە ملەتێ کورد دڤێت ژ ئالییەکی ڤە ژ بۆ بدەستخستنا مافێ پەروەردەیا ب زامانێ کوردی و فەرمیکرنا زمانێ کوردی خەباتێن خوە بمەشینن، لێ ژ ئالییێ دن ڤە ژی دڤێت ئەم زارۆکێن خوە د دەرسا بژارتەیا کوردی دە ژی تۆمار بکن.

ھەروەھا ژ بۆ کو دەرسا بژارتەیا ب زمانێ کوردی ژ دبستانا دەستپێکێ یا زارۆکان و ژ دەستپێکا پۆلا یەکێ ھەتا داوی یا پۆلا 12 بێ پێک ئانین، دڤێت گاڤێن پێویست بێنە ئاڤێتن و د ڤی واری دە، ئەم تێبکۆشن.

ئەم وەکە پارتییا وەلاتپارێزێن کوردستانێ بانگی داییک و باب و مالباتێن کوردان دکن کو ژ بۆ زارۆکێن وە فێری زمانێ داییکا خوە ببن، د ناڤ بەشا زمان و زاراڤەیێن زندی دە زمانێ کوردی (کورمانجی و کردکی/زازاکی) ھلبژێرن.

4/2/2024

نڤێسینگەها راگەھاندنێ یا پارتییا وەلاتپارێزێن کوردستانێ