د ئەنجاما ئێریشێن گرۆپێن چەکداران ل سەر بارەگەھا ئامەریکی یا ل کێلگەھا پەترۆلێ یا ئەل-عۆمەر ل دێرازۆرێ دە، ھەژمارەک ژ شەرڤانێن ھەسەدێ ھاتن کوشتن و بریندار بوون.
رێڤەبەرێ رەوانگەھا سووری یا مافێن مرۆڤان (SOHR) رامی عەبدولرەحمان راگهاند، گرۆپا ب ناڤێ “بەرخوەدانا ئیسلامی ل ئیراقێ” ئیرۆ 5 شباتێ ب درۆنان ئێرشی کێلگەھا پەترۆلێ یا عۆمەر ل دێرازۆرێ کر.
رامی عەبدولرەحمان دا زانین ژی، د ئێریشێ دە 5 شەرڤانێن ھێزێن سووریەیا دەمۆکراتیک (ھەسەدێ) ھاتن کوشتن و 20 شەرڤان ژی بریندار بوون.
ژ ئالیێ خوە ڤە، گرۆپا بەرخوەدانا ئیسلامی ل ئیراقێ ژی ئیرۆ دانێ سبێ راگھاند، وان ب درۆنان ئێرشی بارەگەھا لەشکەری یا ئامەریکی ل سووریێ کریە.
ژ پشتی شەرێ د ناڤبەرا ئیسرایل و حەماسێ د جۆتمەھا سالا بۆری دە، ئێریشێن ل سەر بارەگەھێن لەشکەری یێن ئامەریکایێ ل سووریا و ئیراقێ زێدە بوونە. د بەرسڤێ دە ژی، ئامەریکا ژی چەند جاران ئێریشی بارەگەھێن گرۆپێن چەکداران ل ئیراقێ کرنە.
ل ھەمبەر کوشتنا 3 لەشکەرێن ئامەریکی ل بارەگەھەکێ ل سەر سینۆرێ ئوردنێ، ئامەریکا رۆژا ئینێ ئێریش بر سەر گرۆپ و بنگەھێن ملیسێن ل ئیراق و سووریەیێ، ل گۆری فەرمانداریا ناڤەندی یا ئامەریکایێ (سێنتکۆم)، ل ئیراق و سووریەیێ ل 85 ئارمانجێن فەیلەقا قودس یا سەر ب سوپایا پاسدارێن ئیرانێ ڤە ھاتن وێرانکرن.
